काठमाडौं । नेपाली कांग्रेसको १५औँ महाधिवेशनअन्तर्गत नयाँ केन्द्रीय कार्यसमिति चयनका लागि शुक्रबार मतदान भइरहेको छ। पार्टीको भावी नेतृत्व चयन गर्न काठमाडौंको खुलामञ्च र राष्ट्रिय सभागृहमा बिहान करिब ८ बजेदेखि मतदान सुरु भएको हो।
निर्वाचन समितिले मतदानका लागि दिउँसो ३ बजेसम्मको समय निर्धारण गरेको छ। मतदान प्रक्रियामा सहभागी एक प्रतिनिधिलाई मत खसाल्न करिब ३० देखि ४० मिनेट लाग्ने निर्वाचन समितिका सदस्यसचिव राजु कटुवालले जानकारी दिएका छन्।
महाधिवेशनमा कुल ७ हजार ३१७ प्रतिनिधि सहभागी छन्। उनीहरूले सभापति, उपसभापति, महामन्त्री, सहमहामन्त्रीसहित विभिन्न समूहका केन्द्रीय सदस्य चयन गर्न मतदान गरिरहेका छन्। निर्वाचनले आगामी कार्यकालका लागि पार्टीको नेतृत्व र केन्द्रीय कार्यसमितिको संरचना तय गर्नेछ।
मतदानलाई व्यवस्थित र मर्यादित बनाउन निर्वाचन समितिले विशेष सावधानी अपनाएको छ। मतदानस्थलमा मोबाइल फोनलगायत निर्वाचन आचारसंहिताले निषेध गरेका सामग्री लैजान रोक लगाइएको छ। प्रतिनिधिहरूले निर्धारित प्रक्रिया पूरा गरेपछि मात्रै मतदान गर्न पाउने व्यवस्था गरिएको छ।
मतदान सम्पन्न भएपछि मतपेटिकालाई सुरक्षित रूपमा व्यवस्थापन गरी आवश्यक प्रक्रिया पूरा गरेर मतगणना सुरु गरिने निर्वाचन समितिले जनाएको छ। मतगणना पार्टीको केन्द्रीय कार्यालय सानेपामा गरिनेछ।
कांग्रेसको १५औँ महाधिवेशनलाई पार्टीको भावी दिशा, नेतृत्व र आन्तरिक एकताका दृष्टिले महत्त्वपूर्ण रूपमा हेरिएको छ। मतदानबाट आउने परिणामले पार्टीको आगामी राजनीतिक रणनीति र संगठनात्मक प्राथमिकतासमेत निर्धारण गर्ने अपेक्षा गरिएको छ।
