गोरखा । बूढीगण्डकी नदीमा आएको लेदोसहितको बाढीले आरुघाट–धादिङ जोड्ने मोटरेबल पुल बगाएपछि आवागमन पुनः सहज बनाउन बेलिब्रिज निर्माणको तयारी थालिएको छ।
गोरखा सडक योजनाका अनुसार बेलिब्रिज निर्माणका लागि आवश्यक सामग्री सडक डिभिजन कार्यालय हेटौँडाबाट ल्याउने प्रक्रिया अघि बढाइएको छ। सामग्री निर्माणस्थलमा आइपुग्नेबित्तिकै काम सुरु गर्ने तयारी गरिएको कार्यालयले जनाएको छ।
गोरखा सडक योजनाका प्रमुख विनोद पुनले बेलिब्रिजका सामग्री हेटौँडाबाट ल्याउने तयारी भइरहेको जानकारी दिँदै सम्भवतः भोलिसम्म सामग्री आइपुग्ने बताए। सामग्री प्राप्त भएपछि निर्माण कार्यलाई तीव्रता दिइने उनको भनाइ छ।
यसैबीच, बेलिब्रिज निर्माणको तयारीका लागि नेपाली सेनाको टोली पनि कार्यक्षेत्रमा खटिएको छ। रुद्रध्वज गणका गणपति विरोध रिजालका अनुसार निर्माणस्थलको प्रारम्भिक निरीक्षण गर्न सेनाको टोली परिचालन भइसकेको छ।
बेलिब्रिज निर्माणका लागि आवश्यक सामग्री उपलब्ध हुनासाथ काम सुरु गरिने सेनाले जनाएको छ। पुल बगाएपछि प्रभावित बनेको आरुघाट–धादिङ आवागमनलाई पुनः सहज बनाउन बेलिब्रिज निर्माणलाई प्राथमिकतामा राखिएको छ।
