काठमाडौँ । दसैँ मनाउन घर जाने यात्रुको चाप बढिरहेका बेला पृथ्वी राजमार्ग आज राति ६ घण्टाका लागि बन्द हुने भएको छ। धादिङको गलौँदी क्षेत्रमा त्रिशूली नदीको कटानका कारण भासिएको सडक मर्मत गर्न आज राति ११ बजेदेखि भोलि बिहान ५ बजेसम्म राजमार्गमा सवारी आवागमन बन्द गरिने भएको हो।
धादिङका प्रमुख जिल्ला अधिकारी लक्ष्मी पाण्डेय (गौतम)ले सूचना जारी गर्दै गजुरी गाउँपालिका–५ स्थित गलौँदी क्षेत्रमा सडक मर्मतसम्भार गर्नुपर्ने भएकाले उक्त अवधिमा सवारी आवागमन रोकिने जानकारी दिएकी छन्।
गत असोज २३ गते शुक्रबार सडक भासिएपछि पृथ्वी राजमार्ग अवरुद्ध भएको थियो। असोज २४ गते दिनभरको प्रयासपछि सडक खुलाइए पनि थप मर्मतसम्भार आवश्यक भएपछि पुनः रातिको समयमा राजमार्ग बन्द गर्न लागिएको हो।
दसैँको मुखमा देशको प्रमुख राजमार्गमध्ये एक पृथ्वी राजमार्ग बन्द हुँदा यात्रु तथा यातायात व्यवसायीलाई थप समस्या हुने देखिएको छ। नेपाल यातायात व्यवसायी राष्ट्रिय महासङ्घका अध्यक्ष पुण्यप्रसाद (सरोज) सिटौलाले दसैँका लागि हजारौँ यात्रुले अग्रिम टिकट बुकिङ गरिसकेको अवस्थामा राजमार्ग बन्द हुँदा आवागमन व्यवस्थापनमा चुनौती थपिने बताए।
“दसैँको मुखमा हजारौँ यात्रुले अग्रिम टिकट बुकिङ गरेका छन्, यस्तो अवस्थामा राजमार्ग बन्द हुँदा यातायात व्यवसायीसँगै आम यात्रुलाई समस्या परेको छ,” उनले भने।
नयाँबसपार्कबाट मात्रै दसैँ मनाउन घर जाने यात्रुको सङ्ख्या उल्लेख्य रहेको तथ्याङ्कले पनि यात्रुको चाप देखाउँछ। नयाँबसपार्क सञ्चालन गर्ने संस्था लोत्से बहुउद्देश्यीय प्रालिका महाप्रबन्धक पङ्कज मल्लका अनुसार असोज १७ देखि २५ गतेसम्म दुई लाख सात हजार २५१ यात्रु नयाँबसपार्कबाट बाहिरिएका छन्।
राजमार्ग बन्द हुने समयलाई ध्यानमा राख्दै यात्रुले आफ्नो यात्राको समय व्यवस्थापन गर्न तथा सम्बन्धित निकायबाट जारी हुने सडक र यातायातसम्बन्धी सूचनामा ध्यान दिनुपर्ने देखिएको छ।
