काठमाडौँ । काठमाडौँ उपत्यकामा अपराध नियन्त्रण तथा सार्वजनिक शान्ति सुरक्षा कायम गर्न प्रहरीले सञ्चालन गरेको ‘स्वीप अपरेसन’का क्रममा ९८ जना पक्राउ परेका छन्। सार्वजनिकस्थलमा होहल्ला, दुर्व्यवहार, चोरी, लुटपाट र गुण्डागर्दीजस्ता गतिविधिमा संलग्न व्यक्तिलाई लक्षित गरी सञ्चालन गरिएको अभियानमा अदालतबाट सजाय तोकिएका कसुरदार र फरार प्रतिवादीसमेत पक्राउ परेका हुन्।
जिल्ला प्रहरी परिसर काठमाडौँका अनुसार असोज २६ गतेदेखि २७ गते बिहान ६ बजेसम्म विभिन्न स्थानमा सञ्चालन गरिएको अभियानका क्रममा उनीहरूलाई नियन्त्रणमा लिइएको हो। पक्राउ परेकामध्ये ७६ पुरुष र ११ महिला रहेको प्रहरीले जनाएको छ।
समाजमा शान्ति, सुरक्षा तथा सुव्यवस्था कायम गर्ने उद्देश्यले अभियान सञ्चालन गरिएको जिल्ला प्रहरी परिसर काठमाडौँका प्रवक्ता एवं प्रहरी उपरीक्षक दानबहादुर थापाले जानकारी दिए।
उनका अनुसार सार्वजनिक सेवा प्रवाह गर्ने कार्यालय, सार्वजनिकस्थल तथा यातायातका साधनमा सेवाग्राही र सर्वसाधारणमाथि हातपात गर्ने, होहल्ला तथा हुलहुज्जत गर्ने, दुर्व्यवहार गर्ने, चोरी, लुटपाट, बिचौलियाको गतिविधि र गुण्डागर्दीजस्ता आपराधिक क्रियाकलापमा संलग्न व्यक्तिलाई अभियानको लक्ष्य बनाइएको थियो।
प्रहरीका अनुसार पक्राउ परेकामध्ये विभिन्न मुद्दामा अदालतबाट दण्ड तथा सजाय तोकिएका नौ जना कसुरदार र चालु मुद्दामा फरार रहेका सात जना प्रतिवादीसमेत छन्। उनीहरूलाई नियन्त्रणमा लिनुले अदालतको फैसला कार्यान्वयन र फरार प्रतिवादी पक्राउ गर्ने प्रहरी अभियानलाई समेत सहयोग पुगेको छ।
सार्वजनिक सेवा लिने नागरिकलाई सुरक्षित वातावरण उपलब्ध गराउने र सार्वजनिकस्थलमा हुने अवाञ्छित गतिविधि नियन्त्रण गर्ने उद्देश्यले प्रहरीले यस्ता अभियान सञ्चालन गर्दै आएको छ।
पक्राउ परेका व्यक्तिमाथि थप आवश्यक अनुसन्धान भइरहेको जिल्ला प्रहरी परिसर काठमाडौँले जनाएको छ।
