काठमाडौं । दशैँको मुखमा चीनसँगको प्रमुख व्यापारिक नाका तातोपानी तीन दिनका लागि खुल्ने भएको छ। नेपाली बजारमा उपभोग्य वस्तुको आपूर्ति सहज बनाउने उद्देश्यसहित नेपाल सरकारले गरेको विशेष आग्रहपछि चिनियाँ पक्ष नाका सञ्चालन गर्न सहमत भएको हो।
उद्योग, वाणिज्य तथा आपूर्तिमन्त्री दीपककुमार साहले चिनियाँ पक्षसँग गरेको छलफलपछि अक्टोबर १८ देखि २० सम्म नाका अस्थायी रूपमा सञ्चालन गर्ने सहमति जुटेको हो।
दशैँ नजिकिँदै गर्दा चिनियाँ सामान बोकेका कन्टेनर तथा मालवाहक सवारीसाधन नाकामा रोकिएका कारण व्यवसायी समस्यामा परेका थिए। सामानको आपूर्ति प्रभावित हुँदा बजारमा उपभोग्य वस्तुको अभाव हुनसक्ने र मूल्यवृद्धिको जोखिम बढ्नसक्ने अवस्थालाई ध्यानमा राख्दै सरकारले नाका खुलाउन कूटनीतिक पहल गरेको थियो।
तीन दिनको अवधिमा चिनियाँ भूमिमा रोकिएका तथा भन्सार प्रक्रिया पूरा भएका कार्गो ट्रक र मालवाहक सवारीसाधनलाई मात्र आवतजावत गर्न अनुमति दिइनेछ। यसबाट दशैँका लागि ल्याइएका कपडा, फलफूललगायतका वस्तु नेपाली बजारसम्म पुर्याउन सहज हुने अपेक्षा गरिएको छ।
चाडपर्वका बेला बजारमा वस्तुको अभाव हुन नदिन तथा मूल्यवृद्धि नियन्त्रण गर्न सरकारले आपूर्ति व्यवस्थापनमा विशेष ध्यान दिएको छ। तातोपानी नाका अस्थायी रूपमा खोल्ने सहमतिलाई रोकिएका सामान नेपाल भित्र्याउने र व्यापारिक गतिविधिलाई सहज बनाउने महत्वपूर्ण कदमका रूपमा हेरिएको छ।
नाका सञ्चालनमा आएसँगै लामो समयदेखि सामान रोकिएका व्यवसायीलाई राहत मिल्ने र दशैँको समयमा उपभोक्ताले आवश्यक वस्तु सहज रूपमा प्राप्त गर्न सक्ने विश्वास गरिएको छ। यद्यपि, तीन दिनको सञ्चालनले आपूर्ति व्यवस्थामा कति प्रभाव पार्छ भन्ने कुरा नाकाबाट हुने वास्तविक ढुवानीमा निर्भर रहनेछ।
