काठमाडौं । दसैँको फूलपातीका दिन गृहमन्त्री सुधन गुरुङले काठमाडौंको हनुमानढोका दरबार क्षेत्रमा रहेको तलेजु भवानीको पूजा आराधना तथा जीवित देवी कुमारीको दर्शन गरेका छन्।
गृहमन्त्री गुरुङ आज बिहान हनुमानढुका दरबार क्षेत्र पुगेर तलेजु भवानीको पूजाआजा गर्नुका साथै कुमारीको दर्शन गरेका हुन्। उनले कुमारीको दर्शनका क्रममा सर्वसाधारणसँगै लाइनमा बसेर दर्शन गरेका थिए।
बडादसैँको फूलपातीका दिन हनुमानढोका दरबार क्षेत्रमा रहेको तलेजु भवानी र जीवित देवी कुमारीको दर्शन गर्ने परम्परा छ। यस अवसरमा दर्शन तथा पूजाआराधनाका लागि भक्तजनको उल्लेख्य उपस्थिति रहने गरेको छ।
नेपालीहरूको महान् पर्व बडादसैँमा फूलपातीको विशेष धार्मिक तथा सांस्कृतिक महत्त्व छ। यस दिन देशभरका विभिन्न शक्तिपीठमा पूजा आराधना गर्ने र देवीदेवताको दर्शन गर्ने चलन छ।
फूलपातीका अवसरमा गृहमन्त्री गुरुङले सर्वसाधारणसँगै लाइनमा बसेर कुमारीको दर्शन गर्नु हनुमानढोका दरबार क्षेत्रको धार्मिक तथा सांस्कृतिक परम्परासँग जोडिएको दृश्य बनेको छ।
