काठमाडौँ । बडादसैँको महाअष्टमीका दिन आइतबार पनि काठमाडौँ उपत्यकाबाट घर फर्कने यात्रुको चाप उल्लेख्य देखिएको छ। दसैँ मनाउन गाउँघर जाने यात्रुको भीड नयाँ बसपार्कदेखि कलङ्की, बल्खु, कोटेश्वर र गौशालासम्मका प्रमुख क्षेत्रमा देखिएको हो।
काठमाडौँ उपत्यका ट्राफिक प्रहरी कार्यालयका प्रवक्ता प्रहरी उपरीक्षक (एसपी) नरेशराज सुवेदीका अनुसार घटस्थापनादेखि हालसम्म ४ लाख ९६ हजार यात्रु उपत्यकाबाट बाहिरिएका छन्। दसैँ नजिकिँदै जाँदा घर फर्कने यात्रुको संख्या बढेको हो।
आइतबार बिहान उपत्यकाबाट बाहिरिने सवारीसाधनको चाप बढी देखिए पनि दिउँसो भने क्रमशः घट्दै गएको सुवेदीले जानकारी दिए। महाअष्टमीसम्म आइपुग्दा उपत्यका छाड्ने यात्रुको संख्या बढेसँगै काठमाडौँका सडकमा सवारीसाधनको चापसमेत कम हुँदै गएको छ।
दसैँ मनाउन घर फर्कने क्रमसँगै उपत्यकाका प्रमुख सडक, बजार तथा सार्वजनिक स्थानमा चहलपहल घट्दै गएको छ। लामो दूरीका सवारीसाधनमा यात्रुको चाप देखिए पनि उपत्यकाभित्रको आवागमन भने तुलनात्मक रूपमा सहज बन्दै गएको छ।
