काठमाडौँ । शारदीय नवरात्रको नवौँ दिन आज काठमाडौँ उपत्यकासहित देशभरका प्रमुख शक्तिपीठ तथा देवी मन्दिरहरूमा बिहानैदेखि भक्तजनको घुइँचो लागेको छ। तिथि वृद्धि भएका कारण आज पनि महाअष्टमी मनाइँदै गर्दा श्रद्धालुहरू देवी भगवतीको पूजाआजा तथा दर्शनका लागि विभिन्न शक्तिपीठमा पुगेका हुन्।
नवरात्रका अवसरमा देवीको आराधना, पूजापाठ र दर्शन गर्न भक्तजनको चहलपहल बढेको छ। काठमाडौँ उपत्यकाका गुह्येश्वरी, मैतीदेवी, कालिकास्थान, नक्साल भगवती, भद्रकाली, शोभा भगवती, विजेश्वरी, इन्द्रायणी, रक्तकाली, श्वेतकाली, चामुण्डामाई, सुन्दरीमाई, बज्रयोगिनी, तलेजु भवानी तथा टोखा चण्डेश्वरीलगायतका शक्तिपीठमा बिहानैदेखि दर्शनार्थीको भीड लागेको हो।
भक्तजनको सहज दर्शनका लागि विभिन्न देवी मन्दिरलाई ध्वजापताका तथा बत्तीले सजाइएको छ। धार्मिक आस्था र उत्साहका साथ पूजाआजामा सहभागी हुन पुगेका श्रद्धालुहरूले शक्तिपीठमा लाइन बसेर देवीको दर्शन तथा आराधना गरिरहेका छन्।
उपत्यकाको दक्षिणकाली मन्दिरमा समेत भक्तजनको उल्लेख्य उपस्थिति रहेको छ। त्यस्तै, देशका विभिन्न जिल्लामा रहेका प्रसिद्ध शक्तिपीठहरूमा पनि बिहानैदेखि पूजापाठ गर्ने श्रद्धालुको चहलपहल बढेको छ।
गोरखाको मनकामना, ताप्लेजुङको पाथीभरा, ललितपुरको बगलामुखी, पोखराको विन्ध्यवासिनी, काभ्रेपलाञ्चोकको पलाञ्चोक भगवती, जुम्लाको चन्दननाथ, डोटीको शैलेश्वरी, डडेलधुराको उग्रतारा, बैतडीको त्रिपुरासुन्दरी, नेपालगञ्जको वागीश्वरी, सप्तरीको छिन्नमस्ता तथा राजदेवी, धनकुटाको जाल्पादेवी, धरानको दन्तकाली र बाराको गढीमाईलगायतका धार्मिक स्थलमा भक्तजनले पूजाआजा गरिरहेका छन्।
हिन्दू धर्मपरम्पराअनुसार शारदीय नवरात्रमा महाकाली, महालक्ष्मी र महासरस्वतीको विशेष आराधना गरिन्छ। देवीको उपासना गर्नाले मनोकाङ्क्षा पूरा हुने, शक्ति प्राप्त हुने तथा जीवनमा सुख, शान्ति र समृद्धि आउने धार्मिक विश्वास रहँदै आएको छ।
नवरात्रको नवौँ दिनलाई धार्मिक दृष्टिले विशेष महत्त्वका साथ लिइन्छ। यस अवधिमा भक्तजनले देवीको दर्शन, पूजापाठ र आराधना गरी परिवार तथा समाजको सुख, शान्ति र कल्याणको कामना गर्ने परम्परा छ।
