काठमाडौँ । वैदेशिक रोजगारसम्बन्धी मुद्दामा पक्राउ पुर्जी जारी भएर पनि सम्पर्कविहीन रहेका व्यक्तिलाई वैदेशिक रोजगार विभागले ३५ दिनभित्र उपस्थित हुन निर्देशन दिएको छ।
वैदेशिक रोजगार न्यायाधिकरणबाट अनुमति लिएर विभागले असोज ९ गते सूचना जारी गर्दै सम्बन्धित व्यक्तिलाई विभाग वा नेपाल प्रहरीको सम्पर्कमा आउन आग्रह गरेको हो। तोकिएको समयसीमाभित्र उपस्थित नभए उनीहरूमाथि थप कानुनी कारबाही अघि बढाइने विभागले चेतावनी दिएको छ।
विभागका अनुसार, तोकिएको अवधिमा सम्पर्कमा नआउने व्यक्तिहरूको बैंक खाता तथा बैंकिङ कारोबार रोक्का गर्ने र यात्रा अनुमतिमा प्रतिबन्ध लगाउनेलगायतका प्रक्रिया अघि बढाइनेछ।
वैदेशिक रोजगारसम्बन्धी मुद्दामा कानुनी प्रक्रियाबाट बच्दै सम्पर्कविहीन हुने व्यक्तिलाई कारबाहीको दायरामा ल्याउन विभागले यस्तो कदम अघि बढाएको हो। विभागले वैदेशिक रोजगार ऐन, २०६४ लगायत प्रचलित कानुनबमोजिम आवश्यक कारबाही गरिने जनाएको छ।
