पोखरा । वैदेशिक रोजगारीका लागि विदेश जाने नेपाली श्रमिकले अब पोखरामै स्वास्थ्य परीक्षण गराउन पाउने भएका छन्। पोखरा स्वास्थ्य विज्ञान प्रतिष्ठानअन्तर्गत पश्चिमाञ्चल क्षेत्रीय अस्पतालले फ्लाई दुबईको उडानमार्फत विदेश जाने श्रमिकका लागि स्वास्थ्य परीक्षण सेवा सुरु गरेको हो।
अस्पतालले कात्तिक १ गतेदेखि सेवा सञ्चालनमा ल्याएको हो। युवा, श्रम तथा रोजगार मन्त्रालयले पोखराबाट गन्तव्य मुलुकतर्फ जाने नागरिकको स्वास्थ्य परीक्षण स्थानीय तहमै गर्ने व्यवस्था मिलाउन पत्राचार गरेपछि प्रतिष्ठानले आवश्यक कार्यविधि तयार गरी सेवा सुरु गरेको जनाएको छ।
पोखराबाट फ्लाई दुबईले अन्तर्राष्ट्रिय उडान सञ्चालन गर्न थालेसँगै यस क्षेत्रका श्रमिकलाई स्वास्थ्य परीक्षणका लागि अन्य सहर धाउनुपर्ने बाध्यता कम गर्ने उद्देश्यले सेवा सुरु गरिएको प्रतिष्ठानका निर्देशक डा. झपिन्द्र पोखरेलले बताए।
स्थानीय तहमै स्वास्थ्य परीक्षण सेवा उपलब्ध भएपछि पोखरा तथा आसपासका क्षेत्रबाट वैदेशिक रोजगारीमा जाने श्रमिकलाई समय र खर्च बचत गर्न सहज हुने अपेक्षा गरिएको छ।
