काठमाडौं । उच्च पहाडी तथा हिमाली क्षेत्रमा भारी हिमपात, हिमआँधी र हिमपहिरोको जोखिम बढ्ने पूर्वानुमानपछि अध्यागमन विभागले कात्तिक १२ देखि १४ गतेसम्म पदयात्रा नगर्न र नगराउन आग्रह गरेको छ ।
विभागले मंगलबार सूचना जारी गर्दै उक्त अवधिमा उच्च पहाडी तथा हिमाली क्षेत्रमा प्रतिकूल मौसमको जोखिम रहेकाले पर्यटक, पदयात्री तथा सम्बन्धित सबैलाई सतर्क रहन अनुरोध गरेको हो ।
विभागले उच्च पहाडी तथा हिमाली क्षेत्रमा नजान पर्यटकलाई आग्रह गरेको छ । पदयात्रामा गइसकेका पर्यटकलाई भने जोखिमपूर्ण यात्रा रोक्दै उक्त अवधिभर सुरक्षित स्थानमा बस्न अनुरोध गरिएको छ ।
विभागले सूचनामा भनेको छ, “कुनै पनि निषेधित क्षेत्रमा पदयात्रा गर्न अनुमति लिएका पदयात्रीले सम्भावित जोखिम न्यूनीकरणको लागि उक्त अवधिभर पदयात्रा नगर्नुहुन तथा पदयात्रामा गइसकेको भए सुरक्षित ठाउँमा रहनुहुन अनुरोध छ ।”
त्यस्तै, कात्तिक १२ देखि १४ गतेसम्म उच्च पहाडी तथा हिमाली क्षेत्रका निषेधित क्षेत्रमा जाने पदयात्राका लागि अनुमति जारी नगरिने विभागले जनाएको छ ।
विभागले ट्रेकिङ एजेन्सी, पदयात्री, पथप्रदर्शक तथा अन्य सरोकारवालालाई सूचनाको पालना गर्न आग्रह गरेको छ ।
प्रतिकूल मौसमका कारण हुन सक्ने सम्भावित दुर्घटना र मानवीय क्षति न्यूनीकरण गर्न विभागले पदयात्रा स्थगित गरी सुरक्षित रहन सबैलाई अनुरोध गरेको हो ।
