काठमाडौं । नेपाली कांग्रेसका सभापति गगनकुमार थापाले पार्टीको आधिकारिकतासम्बन्धी राजनीतिक तथा कानुनी संघर्षमा कुनै आर्थिक लेनदेन नभएको दाबी गर्दै आफ्नो नैतिकता र इमानदारीमाथि उठाइएका प्रश्नको कडा प्रतिवाद गरेका छन् ।
बिहीबार अपराह्न सामाजिक सञ्जाल फेसबुकमार्फत भिडियो सन्देश सार्वजनिक गर्दै थापाले आफू कुनै कमजोर नैतिक धरातलमा नरहेको स्पष्ट पारेका हुन् । उनले आफूलाई लक्षित गरेर प्रश्न उठाउनुभन्दा सम्बन्धित विषयमा तथ्य र प्रमाणका आधारमा सही ठाउँमा प्रश्न गर्नसमेत आग्रह गरेका छन् ।
‘ढुक्क हुनुहोस्, मेरा हातहरू सफा छन् । गलत प्रश्न मलाई होइन, सही प्रश्न सही ठाउँमा सोधौँ,’ थापाले भनेका छन् ।
प्रहरी हिरासतमा रहेका इनम सापकोटाको नाम जोडेर सार्वजनिक भएको भनिएको अडियोप्रति प्रतिक्रिया दिँदै थापाले त्यसको सत्यतथ्यबारे आफू अनभिज्ञ रहेको बताएका छन् ।
अडियो कहाँ, कसले, कहिले र कुन परिस्थितिमा बोलेको हो भन्ने नै स्पष्ट नभएको उल्लेख गर्दै उनले त्यसमा बोलिएको हो वा बोलाइएको हो भन्नेसमेत यकिन नभएको बताए ।
कसैले लगाएको आरोप वा सार्वजनिक भएको अपुष्ट अडियोकै आधारमा आफूले जवाफ दिइरहन आवश्यक नरहेको उनको तर्क छ । तर, सार्वजनिक रूपमा प्रश्न उठेकाले आफ्नो धारणा स्पष्ट पार्नु जिम्मेवारी ठानेर भिडियो सन्देश जारी गरेको उनले बताए ।
थापाले पार्टीको आधिकारिकताका लागि भइरहेको राजनीतिक तथा कानुनी प्रक्रियामा आर्थिक चलखेल भएको आरोपलाई पूर्णतः अस्वीकार गरेका छन् । ‘हाम्रो पार्टीको आधिकारिकताको राजनीतिक, कानुनी लडाइँमा एक सुकाको पनि लेनदेन भएको छैन,’ उनले स्पष्ट पारे ।
विशेष महाधिवेशनलाई पार्टीको तल्लो तहका कार्यकर्ताले परिवर्तनको चाहनासहित गरेको विद्रोहका रूपमा व्याख्या गर्दै थापाले त्यसबाट आउन सक्ने परिणामको डरले परिवर्तनको आन्दोलन नरोकिने धारणा राखेका छन् ।
उनका अनुसार विशेष महाधिवेशन र त्यसपछि विकसित राजनीतिक तथा कानुनी घटनाक्रमको वास्तविकता निष्पक्ष अनुसन्धानबाट बाहिर आउनुपर्छ ।
आरोप-प्रत्यारोपभन्दा तथ्य र प्रमाणका आधारमा सत्य स्थापित हुनुपर्नेमा उनको जोड छ ।
‘हामीले चाहेको राम्रो अनुसन्धान होस् भन्ने हो । अनुसन्धानले दूधको दूध, पानीको पानी छुट्याउँछ । हामी त्यसकै प्रतीक्षामा छौँ,’ थापाले भनेका छन् ।
सभापति थापाको यो अभिव्यक्तिले कांग्रेसको आधिकारिकतासम्बन्धी विवादमा उठिरहेका आर्थिक लेनदेन र नैतिकताको प्रश्नलाई पुनः बहसको केन्द्रमा ल्याएको छ । अब सार्वजनिक आरोप, अडियोको प्रामाणिकता र समग्र घटनाक्रमको निष्पक्ष अनुसन्धानबाट वास्तविकता स्थापित हुने अपेक्षा गरिएको छ ।
