काठमाडौं । सरकारले ठमेलमात्र नभई समग्र काठमाडौंलाई २४ घण्टा सञ्चालन गर्ने विषयमा अध्ययन तथा छलफल अघि बढाएको छ।
जिल्ला प्रशासन कार्यालय काठमाडौंका प्रमुख जिल्ला अधिकारी ईश्वरीप्रसाद पौडेलले शुक्रबार ठमेल पर्यटन विकास परिषद्ले आयोजना गरेको छलफलमा यस विषयमा प्रधानमन्त्री कार्यालय र गृह मन्त्रालयसँग छलफल भइरहेको जानकारी दिए।
उनले ठमेललाई पर्यटकीय केन्द्रका रूपमा विकास गर्न सरकार प्रतिबद्ध रहेको बताउँदै गैरकानुनी गतिविधि नियन्त्रणमा घरधनी र व्यवसायीको सहयोग आवश्यक रहेको उल्लेख गरे।
काठमाडौं महानगरपालिकाले सार्वजनिक शौचालय, पार्किङ, फोहोर र ट्राफिक जामलगायत समस्या समाधानका लागि काम भइरहेको जनाएको छ।
यस्तै, ट्राफिक प्रहरीले स्थानीय र व्यवसायी तयार भए ठमेललाई सवारीसाधन निषेधित क्षेत्र बनाउन सहयोग गर्ने जनाएको छ। प्रहरीले ठमेललाई सुरक्षित र व्यवस्थित बनाउन घरधनी तथा व्यवसायीको सहकार्यमा जोड दिएको छ।
काठमाडौंलाई २४ घण्टा सञ्चालन गर्ने योजना कार्यान्वयन भए रात्रिकालीन पर्यटन र व्यवसायले थप गति लिने अपेक्षा गरिएको छ।
