काठमाडौं । तिहारलाई लक्षित गर्दै काठमाडौं महानगरपालिकाले प्लास्टिकजन्य फूल तथा माला बिक्री वितरणमा प्रतिबन्ध लगाएको छ। स्वदेशी किसानले उत्पादन गरेका फूलमालाको बजारीकरण र सर्वसाधारणलाई सहज खरिदको व्यवस्था मिलाउन महानगरले काठमाडौंका ३३ स्थान बिक्री केन्द्रका रूपमा तोकेको छ।
महानगरले तोकेका बिक्रीस्थलमा आज फूलमाला किनबेच गर्नेको चहलपहल बढेको छ। नयाँ बानेश्वर, शंखमुल, बत्तीसपुतली, तीनकुने, चाबहिल, कमलादी, पुतलीसडक, अनामनगर, सुन्धारा, स्वयम्भू, कलंकी, कालिमाटी, हाँडीगाउँ, सामाखुशी, महाराजगञ्जलगायत क्षेत्रमा फूलमाला बिक्रीको व्यवस्था गरिएको छ।
त्यस्तै भृकुटीमण्डप, लगन, जैसिदेवल, टेबहाल मन्दिर परिसर, गोंगबु, बालुवाटार र माछापोखरीलगायत स्थानमा पनि स्वदेशी फूलमाला खरिद गर्न सकिनेछ।
नेपाली किसानले उत्पादन गरेका फूलले उचित बजार पाऊन्, आयातित तथा प्लास्टिकजन्य फूलको प्रयोग निरुत्साहित होस् र उपभोक्ताले सहज रूपमा स्वदेशी फूलमाला खरिद गर्न सकून् भन्ने उद्देश्यले वातावरण विभागसँगको समन्वयमा बिक्रीस्थल तोकिएको महानगरले जनाएको छ।
