बुटवल । नेपाली कांग्रेसका उपसभापति डा. चन्द्र भण्डारीले अनावश्यक विवाद, आरोप–प्रत्यारोप र भ्रम फैलाउन समय खर्चिनुभन्दा जनताको पक्षमा काम गरेर जनमत आर्जन गर्न सरकारलाई सुझाव दिएका छन् ।

नेपाली कांग्रेस रुपन्देही क्षेत्र नम्बर २ ले शनिबार बुटवलमा आयोजना गरेको कार्यक्रममा बोल्दै भण्डारीले सामाजिक सञ्जालमा दर्शक र समर्थक बढाउँदैमा सरकार सफल नहुने बताए । जनताको जीवनमा परिवर्तन ल्याउने कामबाट मात्रै सरकारप्रति विश्वास र समर्थन बढ्ने उनको भनाइ थियो ।

‘काम गरेर जनमत बढाउने हो, अनावश्यक हल्ला र भ्रम फैलाएर जनमत बढ्दैन,’ उनले भने, ‘सामाजिक सञ्जालमा दर्शक र समर्थक बढाएर मात्रै सरकार चल्दैन । जनताको काम गरेर जनमत आर्जन गर्नुपर्छ ।’

सरकारका गतिविधिमा कमजोरी वा गल्ती भए कानुनी प्रक्रियाबाट कारबाही गर्नुपर्ने उल्लेख गर्दै उनले विकास निर्माण र जनताका काम प्रभावित हुने गरी आरोप–प्रत्यारोपमा नअल्झिन आग्रह गरे । युवाको ऊर्जा र क्षमतालाई देश विकासमा लगाउनुपर्नेमा उनले जोड दिए ।

कांग्रेस सभापति गगन थापाको विषयमा बोल्दै भण्डारीले उनलाई लामो समयदेखि चिनेको उल्लेख गरे । थापाले कानुनविपरीत काम गरेको भए कानुनी प्रक्रियाबाट कारबाही गरेर देखाउन उनले सरकारलाई चुनौती दिए ।

प्रधानमन्त्री वालेन्द्र शाह (बालेन) काठमाडौं महानगरपालिकाको मेयर हुँदा तत्कालीन सरकारले आवश्यक कर्मचारी उपलब्ध नगराएको प्रसंग उठाउँदै भण्डारीले त्यसले अहिलेको राजनीतिक परिस्थितिमा भूमिका खेलेको टिप्पणी गरे । त्यसबेला आफूले कांग्रेस, एमाले र माओवादीका शीर्ष नेताहरूलाई सचेत गराएको पनि उनले बताए ।

नेतृत्वको पद र व्यक्तिगत महत्त्वाकांक्षाका कारण समयमै आवश्यक निर्णय हुन नसक्दा देशले त्यसको परिणाम भोग्नुपरेको उनको भनाइ थियो ।

भण्डारीले विगत ३५ वर्षमा केही पनि भएन भन्ने भाष्यप्रति असन्तुष्टि जनाउँदै लोकतन्त्र स्थापना र पूर्वाधार विकासमा विगतका सरकार तथा राजनीतिक दलको योगदानलाई नयाँ नेतृत्वले पनि स्वीकार गर्नुपर्ने बताए ।

‘हामीले बनाएको घरभित्र बालेन आएका हुन् । यो घर बनाउन हजारौँको रगत र बलिदान परेको छ,’ उनले भने, ‘आफूले टुँडिखेलमा लगाएको दुबो मात्रै देख्ने प्रवृत्ति राम्रो होइन ।’

कार्यक्रममा कांग्रेस लुम्बिनी प्रदेश उपसभापति भुवन श्रेष्ठले कांग्रेसलाई कमजोर बनाउने प्रयास सफल नहुने दाबी गरे । कांग्रेस सभापति थापाले अघि सारेको अभियानले पार्टीसँगै मुलुकको भविष्यसमेत राम्रो बनाउने उनको विश्वास थियो ।

त्यस्तै, कांग्रेस केन्द्रीय सदस्य सुशील गुरुङले वर्तमान सरकारका गतिविधि विधिको शासनविपरीत भइरहेको आरोप लगाए । उनले सरकारका गतिविधिबारे जनताले आवाज उठाउनुपर्ने बताउँदै पार्टीभित्रको अराजकता अन्त्य गर्न नेता तथा कार्यकर्तालाई आफ्ना आनीबानी सुधार्न आग्रह गरे ।