काठमाडौं । भोटेकोशी बाढीपछि नुवाकोटमा सञ्चालन गरिएको खोज तथा उद्धार अभियानमा उत्कृष्ट कार्यसम्पादन गर्ने प्रहरी कुकुर ‘ली’ यस वर्षको सर्वोत्कृष्ट प्रहरी कुकुर घोषित भएको छ।
कुकुर तिहारको अवसरमा आइतबार महाराजगञ्जस्थित नेपाल प्रहरी केनाइन कार्यालयले आयोजना गरेको विशेष कार्यक्रममा प्रहरी प्रधान कार्यालयका डीआईजी ओम रानाले ल्याब्राडोर रिट्रिभर जातको भाले कुकुर ‘ली’लाई अवार्ड प्रदान गरे ।
गत भदौ १० गते भोटेकोशीमा आएको बाढीपछि नुवाकोटमा सञ्चालन गरिएको खोज तथा उद्धार कार्यमा ली परिचालित भएको थियो। उद्धारका क्रममा उसले शव तथा शवका अंग पत्ता लगाउन महत्त्वपूर्ण भूमिका निर्वाह गरेको नेपाल प्रहरी केनाइन कार्यालयका प्रमुख एसपी डा. रामचन्द्र सत्यालले जानकारी दिए ।
उक्त विपद्पछि प्रहरीले खोज तथा उद्धारका लागि लीसहित चारवटा तालिमप्राप्त कुकुर परिचालन गरेको थियो। सबैभन्दा बढी प्रभावित रसुवाको टिमुरे क्षेत्रमा जर्मन शेफर्ड र बेल्जियन शेफर्ड जातका कुकुरसमेत परिचालन गरिएको थियो।
टिमुरे क्षेत्रमा प्रहरी कुकुर टोलीकै सहयोगमा तीनवटा शव फेला पारिएको खोज तथा उद्धार अभियानका नेतृत्वकर्ता एसएसपी दीप शमशेर जबराले बताए ।
बाढीपहिरोले पुरिएका घर तथा अन्य संरचनामा समेत कुकुरहरू परिचालन गरिएको थियो। प्रभावित क्षेत्रमा छिटो पुर्याउन प्रहरीले हेलिकप्टरमार्फत कुकुरहरूलाई घटनास्थलसम्म लगेको थियो ।
विपद्का कठिन परिस्थितिमा आफ्नो विशिष्ट क्षमता प्रदर्शन गर्दै मानवीय खोज तथा उद्धारमा महत्त्वपूर्ण योगदान पुर्याएको भन्दै लीलाई वर्षकै उत्कृष्ट प्रहरी कुकुरका रूपमा सम्मान गरिएको हो।
