चितवन । पृथ्वी राजमार्गअन्तर्गत चितवनको घोप्टेभीर, कुरिनटार नजिकै सुक्खा पहिरो खस्दा यातायात आवागमन पूर्ण रूपमा अवरुद्ध भएको छ।
बिहीबार बिहान खसेको पहिरोले राजमार्गको दुवैतर्फको सडक अवरुद्ध भएपछि सवारीसाधन बीच बाटोमै रोकिएका छन्। नागढुंगा–मुग्लिन सडक योजना पश्चिम खण्डका अनुसार पहिरो हटाउन मेशिन तथा उपकरण परिचालन गरिएको छ।
इन्जिनियर सचिन्द्र मिश्रले पहिरो पन्छाउन करिब तीन घण्टा लाग्ने अनुमान गरिएको जानकारी दिएका छन्। पहिरो हटाउने काम जारी रहेकाले यात्रु तथा सवारीचालकलाई वैकल्पिक व्यवस्था र सडक खुल्ने अवस्थाबारे जानकारी लिएर मात्र यात्रा गर्न आग्रह गरिएको छ।
