काठमाडौं । चितवनको घोप्टेभीरमा पटक–पटक पहिरो खस्दा पृथ्वी राजमार्गको मलेखु–मुग्लिङ सडक खण्डमा यातायात सञ्चालन प्रभावित भएको छ। गएरातिदेखि सुक्खा पहिरो खसेपछि सडक दुईतर्फी अवरुद्ध भएको हो।
प्रहरीका अनुसार अहिले पहिरो हटाउने काम भइरहेको छ। थप पहिरो नखसे केही समयभित्रै सडक खुलाएर यातायात सञ्चालनमा ल्याउन सकिने नागढुंगा–मुग्लिङ सडक योजना (पश्चिम खण्ड) ले जनाएको छ।
यसअघि आइतबार र सोमबार पनि सोही स्थानमा पहिरो खस्दा सडक अवरुद्ध भएको थियो। लगातार पहिरो खस्न थालेपछि यस सडक खण्डमा यात्रा गर्ने यात्रु तथा सवारी चालकलाई सास्ती भएको छ।
