बुटवल । लुम्बिनी प्रदेशका १२ वटै जिल्लामा डेंगु भाइरसको संक्रमण फैलिएको छ । पछिल्लो समय प्युठानमा पनि डेंगु संक्रमण देखिएसँगै प्रदेशका १२ वटै जिल्लामा डेंगु संक्रमण फैलिएको हो ।
इपिडिमियोलोजी तथा रोग नियन्त्रण महाशाखाको तथ्याङ्क अनुसार लुम्बिनी प्रदेशका १२ जिल्लामा ८ महिनाको अवधिमा २ सय १९ जनामा डेंगु संक्रमण देखिएको छ । भने, अन्य प्रदेशको तुलनामा लुम्बिनी प्रदेशमा यो संख्या कम मानिएको छ ।
महाशाखाका अनुसार साउन २४ गते सम्म सवैभन्दा बढि कोशी प्रदेशमा डेंगुको संक्रमण फैलिएको जनाएको छ । त्यहाँ ८ हजार ४ सय २० जनामा डेंगु संक्रमण देखिएको र बागमती प्रदेशमा १ हजार ५ सय ४७, गण्डकीमा ४ सय ८१, सुदुरपश्चिममा ४ सय ४ जनामा डेंगु संक्रमण देखिएको उल्लेख छ ।
त्यस्तै मधेश प्रदेशमा ५८ र कर्णाली प्रदेशमा जम्मा २८ जनामा डेंगु संक्रमण देखिएको महाशाखाले जनाएको छ । सवैभन्दा धेरै पाल्पामा ५३ जनामा संक्रमण पुष्टि भएको छ । रुपन्देहीमा ५०, गुल्मीमा ५, अर्घाखांँचीमा २०, बाँकेमा २६, कपिलबस्तुमा ८, दाङमा ३३ र बर्दियामा १७ जनामा डेंगु पुष्टि भएको छ । यसैगरी रुकुम पुर्वमा ३, नवलपरासी पश्चिममा ३ तथा रोल्पा र प्युठानमा १/१ जनामा डेंगु संक्रमण देखिएको महाशाखाले तयार पारेको तथ्याङकले जनाएको छ ।
