काठमाडौं । नेपाली फिल्म गोर्खा वारियर्सलाई बेलायतको प्रतिष्ठित आइम्याक्स सिनेवर्ल्डमा रेडकार्पेट प्रिमियर गरिने भएको छ । उक्त फिल्मको टिमले मंगलबार काठमाडौंमा पत्रकार सम्मेलन गर्दै भदौ २४ (१० सेप्टेम्बर) मा फिल्मलाई प्रिमियर गर्न लागिएको जानकारी दिए ।
सेप्टेम्बरमै फिल्मलाई हङकङ र सिंगापुरमा समेत प्रिमियर गर्न लागिएको निर्माता तथा निर्देशक मिलन चाम्सले बताए । सेप्टेम्बरलाई ‘प्रिमियर मन्थ’को रुपमा मनाइने योजना रहेको बताउदै लण्डनको लिसेस्ट स्क्वायर स्थित आइम्याक्स हलमा हुने प्रिमियरमा बेलायती राजपरिवारका सदस्य, सांसद, स्थानीय निकायका प्रमुख, बेलायती सेनाका जनरल, गोर्खा रेजिमेन्ट अधिकृत, नेपाली दूतावास, सेलिब्रिटी लगायतलाई निम्तो दिइएको चाम्सले बताए ।
‘फिल्ममा रितेश चाम्सको शीर्ष भूमिका छ भने अन्य कलाकारहरुमा विजय लामा, रेविका गुरुङ लगायतले अभिनय गरेका छन् । लण्डन सिनेआई प्रोडक्सनको प्रस्तुति र चाम्स इन्टरटेनमेन्टको सहकार्यमा फिल्म निर्माण भएको हो ।
