काठमाडौं । प्रधानमन्त्री पुष्पकमल दाहाल प्रचण्डले मुलुकलाई सुशासनतर्फ अघि बढाउदा प्रतिक्रियाबादीहरु अतालिएको बताउनुभएको छ । शनिबार "जनतासँग माओवादी" विशेष रूपान्तरण अभियान’ अन्तर्गत चन्द्रगिरि नगरपालिका–२ मा आयोजित कार्यक्रमलाई स्म्बोधन गर्दै प्रधानमन्त्री प्रचण्डले भ्रष्टाचारदेखि सुन तस्करीसम्मको जालो भत्काउने काम आफुले गरेकाले प्रतिक्रियाबादीहरु अतालिएको बताउनुभएको हो ।
माओवादी अध्यक्ष समेत रहनुभएका प्रचण्डले आफु नेतृत्वको सरकारले गरेका राम्रा कामका कारण आगामी निर्वाचनमा माओवादी पहिलो पार्टी बन्ने डरले प्रतिक्रियाबादीले अनेक षडयन्त्र समेत गर्न खोजेको धारणा राख्नुभयो ।
उहाँले देशलाई शुद्धिकरण गर्ने अभियान कुनै हालतमा नरोकिने स्पष्ट पार्नुभयो । उहाँले आफु नेतृत्वको सरकारको ८ महिना पुगेको र ५ बर्ष नै सरकारबाट हट्न नपर्ने अवस्था आफुले देखेको जिकिर गर्नुभयो ।
जनताको साथ समर्थन कायम रहे गठबन्धन पाँचै बर्ष कायम रहने र शुद्धिकरणको अभियान पनि दृढताका साथ अघि बढ्ने उहाले बताउनुभयो ।
