काठमाडौं । नक्कली भुटानी शरणार्थी प्रकरणमा मुछिएका पूर्वगृहमन्त्री बालकृष्ण खाँणले नक्कली भुटानी शरणार्थी प्रकरणमा आफ्नो कुनै संलग्नता नरहेको दाबी गरेका छन्। अधिकारप्राप्त सरकारी अधिकारीसमक्षको बयानका क्रममा खाँणले आफूलाई आफ्नो मोबाइल फ्याक्ट्री रिसेट भएकोबारे पनि जानकारी नरहेको दाबी गरेका छन्।
‘भुटानी शरणार्थीको नाममा नेपालीलाई मिसाएर भुटानी शरणार्थी बनाई तेस्रो देश पठाइदिन्छौँ भनी रकम लिएको भन्ने आरोपमा मेरो संलग्नता छैन। मेरो मोबाइल फ्याक्ट्री रिसेट कसरी भयो मलाई थाहा भएन,’ उनले भनेका छन्। गृहमन्त्रीको ओहोदामा हुँदा तथा मन्त्रीको ओहोदामा नहुँदासमेत नेपालको छवि उच्च राख्ने काम गरेको उनको दाबी छ।
बरु कोरोना संक्रमणले मुलुक आक्रान्त बनेको समयमा भुटानी र तिब्बतीयन शरणार्थीलाई भ्याक्सिन लगाउन पहल गरेको उनको भनाइ छ। आफ्नो उक्त कार्यको अन्तर्राष्ट्रिय समुदायले समेत प्रशंसा गरेको पनि खाँणको दावी छ। उनले नेपालीलाई नक्कली भुटानी शरणार्थी बनाएर अमेरिका पठाउने कार्य ठिक नभएकाले आफूले यस्तो कार्य सोच्न पनि नसक्ने बताएका छन्।
उनले बयानमा भनेका छन्, ‘म मिति २०७८ साल असार महिनाको २९ गते देखि मिति २०७९ पुस महिना सम्म गृहमन्त्रीको रुपमा काम काम गरेको हुँ। म गृह मन्त्री रहँदा संविधान र कानूनको अधिनमा रही देशमा शान्ति सुरक्षा अमनचयन कायम गर्ने लगायत मन्त्रीले गर्नु पर्ने काम ईमान्दारीपूर्वक सम्पादन गरेको हुँ।
