बाँके। बाँकेको शम्शेरगन्ज नजिक पुर्बपश्चिम राजमार्गमा भएको सवारी दुर्घटनामा घाइते भएकाहरुको स्वास्थ्य अवस्था बुझन लुम्बिनी प्रदेशका मुख्यमन्त्री डिल्लीवहादुर चौधरी आइतवार अस्पताल पुग्नु भएको छ । दाङका विभिन्न धार्मीक तथा पर्यटकीय स्थलहरुको अवलोकन भ्रमण सकेर घर फर्किदै गरेको गाडी बाँकेको शम्शेरगञ्जमा सडकमा रोकिराखेको ट्रकमा ठोक्किर दुर्घटना हुँदा ७ जनाको मुत्यु भएको थियो,भने २३ जना घाइते भएका थिए ।
मुख्यमन्त्री चौधरीले कोहलपुर मेडिकल कलेजमा उपचाररत १३ घाइतेहरुलाई प्रत्यक्षरुपमा भेटेर स्वास्थ्य लाभको कामना गर्दै स्वास्थ्य अवस्था वारेमा जानकारी लिनु भएको हो । उपचाररत घाइते विरामीहरुलाई उपचारमा कमिकमजोरी आउन नदिन अस्पताल प्रशासनलाई निर्देशन समेत दिनुभएको बताईएको छ । उपचाररत घाइतेहरुको स्वास्थ्यलाभको कामना गर्दै घाइतेहरुको उपचार र मृतकहरुको राहातका लागि प्रदेश सरकारले पहल गर्ने आश्वासन दिनुभएको छ। दुर्घटनाले बर्दियाको ठाकुरद्धारा नगरपालिकाबासीको निधनले शोकमा डुबेकोप्रति दुख व्यक्त गर्दै मृतकहरुप्रति श्रद्धाञ्जली र परिवारजनमा समवेदना प्रकट गर्नुभएको छ ।
अस्पतालका प्रमुख सुनिल सिंहले उपचारमा कुनै पनि समस्या नआउने र उपचारलाई प्रभावकारी बनाइएको जानकारी बताउनु भएको छ। अस्पतालमा उपचार सम्भव नभएकालाई रिफर गरिएको र सम्भव भएकाहरुको उपचार कोहलपुरमै भइरहेको प्रमुख सिहले जानकारी दिनु भयो । नेपाली काँग्रेस संसदीय दलका नेता जन्मजय तिमिल्सिनाले उक्त दुर्घटनाले प्रदेश नै मर्माहत भएको भन्दै सरकार गम्भीर हुनु पर्ने बताउनु भएको छ ।
