सुदिप पौडेल -प्रमुख, कपिलवस्तु नगरपालिका
सङ्घीयता आएपछि पहिलेको तुलनामा अवश्य पनि धेरै कुरामा राम्रो भएको छ । जनताले आफ्ना समस्याहरू निरन्तर रूपमा राख्ने, आफ्ना काम गराउनलाई जोसँग पनि बोल्न सक्ने आफ्नो आवाज उठाउन सक्ने वातावरण सिर्जना भएको छ ।
सुशासनदेखि लिएर सबै कुरा हामीले कायम गर्न सक्यौ भन्ने हैन । यसमा अझै धेरै काम गर्नै बाँकी छ । हामी पनि जनप्रतिनिधिको रूपमा भर्खरै चुनाव जितेर आएका छौ । अझै राम्रोसँग नगरपालिका र त्यसको काम कर्तव्य, अधिकार विकासका धेरै कामहरू हेर्न भ्याएका छैनौ ।
अब आउने दिनमा हामीले पनि आफ्नो क्षेत्रबाट नगर प्रमुखको हैसियतले गर्नुपर्ने काम, कर्तव्य र अधिकारको क्षेत्रमा रहेर जनताको कामका लागि हामी अगाडी बढ्छौ । स्थानीय निकायमा साह्रै बेथिति छ, लुट छ भन्ने होइन । बाहिर आउने हल्ला जस्तो सबै पालिकामा भएको पक्कै छैन ।
कहिकतै कमजोरी भएमा पनी हामीले सच्याएर अगाडि बढाउनु पर्छ । काम गर्दा हामीले पारदर्शितामा जोड दिनुपर्छ । देशमा भष्ट्रचार मौलाउनु जनताले आफ्नो अधिकारको सही सदुपयोग गर्न नपाउनु भनेकै सुशासन सही ढङ्गले अगाडी नबढ्नु हो ।
सबैले आफ्नो काम कर्तव्य बुझेर इमान्दार पुर्वक काम गर्ने हो भने मुलुकको बिकास र समृद्धि हुन धेरै समय लाग्दैन । हामी जनप्रतिनिधी भएर आएपछी जनता प्रति उत्तरदायी हुनुपर्दछ ।
