काठमाडौं । उपप्रधान एवं गृहमन्त्री नारायणकाजी श्रेष्ठले देशमा सुशासन कायम राख्न भ्रष्टाचार र अनियमिततामा जो कोही दोषी देखिए कारबाही गर्न पछि नहट्ने बताएका छन् । काठमाडौंमा भएको स्थानीय तहका दलित जनप्रतिनिधिको प्रथम राष्ट्रिय भेलामा बोल्दै गृहमन्त्री श्रेष्ठले भ्रष्टाचार र अनियमिततामा दोषी देखिए जुनसुकै पार्टीको नेता भए पनि कारवाही गर्ने बताए ।
गृहमन्त्री श्रेष्ठले नक्कली भुटानी शरणार्थी प्रकरणमा राज्यले थालेको अनुसन्धान खेर नजाने बताउदै अनुसन्धान स्वतन्त्र र निष्पक्ष रुपमा गरी दोषीमाथि कारबाही गर्ने बताए। उनले आफ्नै पार्टी नेकपा(माओवादी केन्द्र) का नेताहरू भ्रष्टाचार र अनियमितता काण्डमा परे भने पनि कारबाही गर्न पछि नहट्ने जिकिर गरे ।
उनले बढुवा, सरुवाको निम्ति रकम दिने र लिनेलाई दुवैलाई जेल हाल्ने चेतावनी पनि दिए।
