काठमाडौँ । सर्वोच्च अदालतको आदेशलाई अटेर गरी कनिष्ठलाई नियुक्ति दिने कृषि तथा पशुपन्छी विकास मन्त्री डा. बेदुराम भुसालविरुद्ध अन्तरिम आदेश जारी भएको छ ।
नेपाल कृषि अनुसन्धान परिषद् (नार्क)को कार्यकारी निर्देशक पदमा मन्त्री भुसालले कनिष्ठलाई दिएको नियुक्ति कार्यान्वयन नगर्नरनगराउन सर्वोच्च अदालतले अन्तरिम आदेश जारी गरेको हो ।
नार्कका वैज्ञानिक डा. दोजराज खनालले दायर गरेको रिटमा सर्वोच्चका न्यायाधीश डा. नहकुल सुवेदीको एकल इजलासले आइतबार अन्तरिम आदेश दिएको हो ।
नार्कको कार्यकारी निर्देशक पदमा कनिष्ठलाई नियुक्त गरिएको भन्दै डा. खनालले कृषि मन्त्रालय र नार्कका कार्यकारी निर्देशक पदमा कायम मुकायम मुकरर गरिएका डा. ध्रुवराज भट्टराईलाई विपक्षी बनाइ रिट दायर गरेका थिए ।
सर्वोच्चको आदेशमा भनिएको छ, ‘निवेदकले अन्तरिम आदेशसमेत माग गरे तर्फ विचार गर्दा रिट निवेदक डा. दोजराज खनाल प्रत्यर्थी नेपाल कृषि अनुसन्धान परिषद्को एस-६ तहका मुख्य वैज्ञानिक पदमा कार्यरत रही सो परिषद्को केन्द्रीय कार्यालयमा कार्यरत कर्मचारीहरू मध्ये सबैभन्दा वरिष्ठतम् भएको भन्ने सो परिषद्को मिति २०८०/१०/२३ को पत्रबाट देखिन्छ ।’
तर, मन्त्री भुसालले वरिष्ठतम् वैज्ञानिक डा. खनाल हुँदा हुँदै उनी भन्दा कनिष्ठ एस-४ तहका डा. ध्रुवराज भट्टराई पटक/पटक नियुक्त गरेका थिए । सर्वोच्चले उपलब्ध कर्मचारीमध्ये सामान्यतया वरिष्ठतम् कर्मचारीलाई कायम मुकायम मुकरर गर्नु कर्मचारी प्रशासनको मान्यतासमेत रहेको स्मरण गराएको छ ।
नेपाल कृषि अनुसन्धान परिषद् कर्मचारी प्रशासन विनियम, २०४९ को विनियम २२ को मर्म पनि सोही अनुरूप छ । ‘वरिष्ठतम कर्मचारीलाई नै कायम मुकायम मुकरर गरिनुपर्ने भनी यस अदालतबाट यिनै निवेदकले यसै विषयमा दायर गरेको ०७९-डब्लुओ-१५४५ को रिट निवेदनमा व्याख्या भएको अवस्थासमेत छ ।
यस स्थितिमा एस-६ तहका मुख्य वैज्ञानिक पदका रिट निवेदक भन्दा दुई तह मुनिका एस-४ तहका कर्मचारीलाई कायम मुकायम मुकरर गर्नु उचित देखिएन’, सर्वोच्चको आदेशमा भनिएको छ ।