नेपालगञ्ज । लुम्बिनी प्रदेशकी सहरी विकास मन्त्री कृष्णा केसी नमुनाले योग विज्ञान जीवनोपयोगी भएकाले हरेक नागरिकले योग गर्नुपर्ने बताउनुभएको छ ।
योग समिति नेपालको साधारणसभा एवम् तेस्रो अधिवेशनको शनिवार नेपालगञ्जमा उदघाटन गर्दै मन्त्री केसीले अस्वस्थकर जीवनशैली बढ्दै गएको सन्दर्भमा हरेक नागरिकलाई योगमा जोड्न जरुरी रहेको बताउनुभयो ।
स्वस्थ नागरिक उत्पादन गर्नु पनि विकासको अवधारणाभित्र पर्ने बताउँदै मन्त्री केसीले योग विज्ञानलाई सदुपयोगको लागि सरकार गम्भीर हुन जरुरी रहेको महसुस भईरहेको उल्लेख गर्नुभयो ।
बाँकेका प्रत्येक पालिकामा योग समितिलाई क्रियाशिल र ब्यवस्थित बनाउन सुझाव दिँदै मन्त्री केसीले नेपालगञ्जमा अब हजारौं नागरिकले एकसाथ योग गर्न मिल्ने भवनको योजना सहित प्रस्ताव लिएर आउन आग्रह गर्नुभयो ।
मन्त्री केसीले भन्नुभयो ‘तपाईहरु यसको योजना सहित प्रस्ताव लिएर आउनुस म विधी र प्रक्रिया अनुसार मन्त्रालयको तर्फबाट सहयोगको लागि तयार छु ।’
योग विज्ञान मानव जीवनका लागि अत्यन्त महत्वपूर्ण भएको बताउँदै उहाँले स्वस्थ मनस्थिति, स्वस्थ विचार र शारीरिक तन्दुरुस्तीले मात्र सार्थक र सुन्दर जीवन बाँच्न सकिने उल्लेख गर्नुभयो । स्वस्थ भएमात्र मानव क्रियाकलाप सही ढंगले अगाडि बढ्ने मन्त्री केसीको भनाई छ ।
बाँकेमा २०७६ सालमा स्थापना भएको योग समिती नेपालमार्फत नेपालगञ्ज उपमहानगरपालिकाको २३ वटै वडामा हाल ७ हजार जनाले योगबाट लाभ लिईरहेको योग समिति नेपालका केन्द्रीय अध्यक्ष एवं योगगुरु गिरिराज भट्टराईले जानकारी दिनुभयो ।
अध्यक्ष भट्टराईका अनुसार योग समिति नेपाल हाल ७ वटा जिल्लामा पुगिसकेको र डेढलाख बढीले लाभ लिएका छन् ।
देशका नागरिकलाई स्वस्थ बनाउन र स्वस्थ जिवन शैली अपनाउन सिकाउन राज्यले गर्नुपर्ने काम समुदाय स्तरबाट योगसमिती नेपालले गरिरहेको योग गुरु भट्टराईले दाबी गर्नुभयो । साधारण सभामा २३१ जनालाई योग समिति नेपालको आजिवन सदस्यता पनि वितरण गरिएको थियो ।
तेस्रो अधिवेशनबाट अध्यक्षमा योगगुरु गिरिराज भट्टराई, उपाध्यक्ष निर्मला शाह र लोकमाया सुवेदी (सुमित्रा), सचिव चिरञ्जीवी ज्ञवाली, कोषाध्यक्ष अम्बिका कोइराला सहसचिव टंक पौडेल, सहकोषाध्यक्ष मन्दरा शर्मा चयन हुनुभएको छ ।
यसैगरी सदस्यहमा झबिलाल शर्मा, प्रेम केसी, सविता शर्मा, दिपक थापा, मेघराज बराल, प्रमोद अग्रबाल र मनोनित सदस्य सुनिता पन्थी र वसन्त गौतम चयन हुनुभएको छ।
