काठमाडौँ । नेकपा माओवादी केन्द्रका उपाध्यक्ष एवं पूर्व सभामुख कृष्णबहादुर महरालाई लाजिम्पाटस्थित केन्द्रीय अनुसन्धान ब्युरो (सीआइबी)को कार्यालय पुर्याइएको छ ।
सुन तस्करी प्रकरणको अनुसन्धानका लागि सोमबार कपिलवस्तुको पकडीबाट नियन्त्रणमा लिएका महरालाई प्रहरीले गौतम बुद्ध विमानस्थल हुँदै काठमाडौँ ल्याई सीआइबीको कार्यालय पुर्याएको हो ।
महराविरुद्ध मुद्दा उठाएर थुनाका लागि म्याद थप्न सरकारी वकिल कार्यालयमा लैजाने सीआइबीको तयारी छ ।
पूर्व न्यायाधीश डिल्लीराज आचार्यको नेतृत्वको सुन तस्करी सम्बन्धी छानबिन गर्न गठित आयोगले सुन तस्करीमा महराको संलग्नता रहेको भन्दै मुद्दा चलाउन सिफारिस गरेको थियो ।
आयोगले बुझाएको प्रतिवेदनअनुसार आरोपितहरूलाई कारबाही गर्न उपप्रधान एवं गृहमन्त्री रवि लामिछानेले प्रहरीको सीआइबीलाई निर्देशन दिएका थिए । सोही अनुसार उनीमाथि अनुसन्धान गर्न सोमबार पक्राउ गरिएको हो ।
सुन तस्करी प्रकरणमा छोरा राहुल पक्राउ परेको झन्डै ७ महिनापछि महरा पक्राउ परेका हुन् । यसअघि महराका छोरा राहुल गत भदौ १३ मा पक्राउ परेका थिए । उनीमाथि अनुसन्धान भइरहेको छ ।
सीआइबीले सुरुमा उनीहरूलाई अनुसन्धानमा ल्याउन आनाकानी गरेको थियो । तर, सुन तस्करीमा संलग्न चिनियाँ गिरोहसँग महरा बाबुछोराको पटक–पटक टेलिफोन संवाद भएको सरकारी अनुसन्धानबाटै पुष्टि भएको छ ।
साउन २ मा ब्रेक सुमा लुकाएर ल्याइएको ६१ किलो र २०७९ पुसमा विद्युतीय चुरोट (भेप) मा ल्याइएको ९ किलो सुन तस्करीमा पूर्वसभामुख एवं माओवादी उपाध्यक्ष महरा, उनका छोरा राहुल, पूर्वउपराष्ट्रपतिका छोरा दीपेश पुन र परराष्ट्रविज्ञ जीवन गुरुङ मुछिएका छन् ।
महरा साढे चार वर्षको अवधिमा दोस्रो पटक पक्राउ परेका हुन् । महरा पहिलो पटक २०७६ साल असोज १९ गते बलात्कार आरोपमा पक्राउ परेका थिए । महरालाई जिल्ला अदालतले सफाइ दिएको थियो ।
