काठमाण्डौं । शक्ति संचयका लागि प्रधानमन्त्री एवं नेकपा माओवादी केन्द्रका अध्यक्ष पुष्पकमल दाहाल प्रचण्डको नेतृत्वमा समाजवादी केन्द्र घोषणाको तयारी भएको छ । आज दिउँसो कार्यक्रम गरी नीति र उद्देश्यसहित समाजवादी केन्द्र वा मोर्चा घोषणा गर्न लागिएको हो । नेकपा माओवादी, नेकपा एस, जसपा सहितका दलहरुले धेरै अगाडि प्रयास गरेको मोर्चा गठनलाई आज पूर्णता दिन लागिएको हो ।
सरकारमा रहेका तीन दल र सरकार बाहिर रहेको नेत्रविक्रम चन्द विप्लव नेतृत्वको नेपाल कम्युनिस्ट पार्टी मिलेर आज समाजवादी मोर्चाको घोषणा हुने बताईएको छ । नेकपा माओवादी केन्द्र, नेकपा एकीकृत समाजवादी, जनता समाजवादी पार्टी र नेपाल कम्युनिस्ट पार्टी मिलेर समाजवादी मोर्चा घोषणा हुन लागेको नेकपा एसका प्रचार विभाग प्रमुख जगन्नाथ खतिवडाले जनाकारी दिए ।
यो मोर्चाका लागि लामो समयदेखि छलफलरत नेपाल समाजवादी पार्टीका अध्यक्ष डा. बाबुराम भट्टराईलाई भने बाहिरै राख्ने लगभग निश्चित भएको छ । स्रोतका अनुसार जसपा अध्यक्ष उपेन्द्र यादवले बाबुरामलाई मोर्चामा सहभागी गराउन नहुने अडान लिएपछि उनलाई बाहिर राखिएको हो । बाबुराम मोर्चामा सहभागी भए आफू नरहने यादवको धम्कीपछि नेसपालाई बाहिरै राखिएको हो । ‘चार पार्टीसहितको समाजवादी मोर्चा शुक्रबार नै घोषणा गर्ने तयारी छ ।
माओवादी केन्द्रका उपाध्यक्ष कृष्णबहादुर महरासँगको छलफलपछि विप्लव पनि समाजवादी मोर्चामा आउन सहमत भएका हुन् । प्रधानमन्त्री तथा नेकपा माओवादी केन्द्रका अध्यक्ष पुष्पकमल दाहाल प्रचण्डले बुधबार दाङमा आयोजित कार्यकर्ता भेलालाई सम्बोधन गर्दै समाजवादी मोर्चा घोषणा अन्तिम चरणमा पुगेको बताएका थिए ।
त्यसअघि माधव नेपालले पनि भक्तपुरमा आयोजित कार्यक्रममा मोर्चा गठन तयारी भएको बताएका थिए । तर उनले नेकपा पनि व्यूताउनु पर्ने धारणा सार्वजनिक गरेका थिए । चार पार्टी मिलेर बन्ने समाजवादी मोर्चा तेस्रो निर्णायक शक्ति बन्नेछ । मोर्चामा सामेल हुने माओवादी केन्द्रसँग ३२, जसपासँग १२ र नेकपा एसको १० सिट छ । प्रचण्डले समाजवादी मोर्चामा नेसपा अध्यक्ष भट्टराई र एमाले छाडेर नेकपा एकता अभियान चलाइरहेका वामदेव गौतम पनि सामेल हुने बताइएको भएपनि गौतमले अहिलेसम्म कुनै निर्णय दिएका छैनन् ।
एमाले र माओवादीबीच २०७५ जेठ ३ मा एकतापछि पार्टीको नाम नेकपा बनेको अवस्थामा ठूलो कम्युनिष्ट पार्टी थियो । तर सर्वोच्च अदालतले २०७७ फागुनमा एमाले र माओवादी अलग गरिदिएपछि नेकपा विभाजन भयो । एमाले र माओवादी दुवै क्षयीकरणको दिशामा छन् ।
