न्यूयोर्क । गाजा क्षेत्रमा खाद्य अभाव र कुपोषण भयावह रूपमा बढ्दै गएको भन्दै संयुक्त राष्ट्रसंघले गहिरो चिन्ता व्यक्त गरेको छ । विशेषगरी महिला र बालबालिका तीव्र भोकमरीको शिकार भइरहेका छन्, जसका कारण दैनिकजसो ज्यान गुमाउने घटनाहरू बढ्दै गएका छन् । संघको मानवीय मामिलाका लागि समन्वय कार्यालय (ओसीएचए) को प्रतिवेदनअनुसार इजरायली प्रशासनले गाजाको उत्तरी क्षेत्रमा पुनः जबरजस्ती विस्थापनको आदेश दिएको छ, जसले कुपोषित नागरिकहरूको स्वास्थ्य संकट थप गम्भीर बनाएको छ ।
हाल गाजामा इन्धनको चरम अभाव देखिएको छ । फोहर व्यवस्थापन ठप्प छ, पानीका कुवाहरू बन्द छन् र डायलाइसिसजस्ता जीवनरक्षक स्वास्थ्य सेवाहरू पनि बन्द हुन थालेका छन् । मानवीय सहायता गाजाभित्र पुर्याउने प्रयाससमेत असफल भइरहेका छन्, हालैका १३ प्रयासमध्ये मात्र ७ मा इजरायली प्रशासनले अनुमति दिएको छ ।
संयुक्त राष्ट्रसंघले गाजाको अवस्था अब ‘सामान्यजस्तो देखिने’ त्रासदीमा परिणत भएको बताउँदै युद्ध, विस्थापन, भोकमरी, इन्धन संकट र जनमानसमा बढ्दो निराशालाई सामूहिक अभावको चिन्ताजनक उदाहरणका रूपमा उल्लेख गरेको छ । यसैबीच, खाद्यान्नको अभावले दुर्भिक्षको अवस्था सिर्जना गरिरहेको र अन्तर्राष्ट्रिय समुदाय अझै मौन रहँदा राष्ट्रसंघ तथा अन्य अन्तर्राष्ट्रिय संस्थाहरूले गहिरो खेद व्यक्त गरेका छन् ।
