काठमाडौं । इजरायलले उत्तरी गाजा पट्टीको अल-तुआम क्षेत्रमा शनिबार गरेको भीषण हवाई आक्रमणमा परी पाँच जना प्रहरी अधिकारीको मृत्यु भएको छ भने कैयौँ अन्य घाइते भएका छन्। गाजा शहरस्थित अल-शिफा अस्पतालका अनुसार उक्त क्षेत्रमा रहेको प्रहरी चौकीलाई लक्षित गरी इजरायलले सो आक्रमण गरेको थियो। अस्पताल स्रोतले दिएको जानकारी अनुसार आक्रमणमा परी शहादत प्राप्त गरेका पाँचै जना प्रहरीको शव र घाइतेहरूलाई उपचारका लागि अस्पताल ल्याइएको छ।
यस घटनाका सम्बन्धमा इजरायली सैन्य स्रोतले एएफपीलाई बताएअनुसार सेनाले सो क्षेत्रमा सक्रिय रहेका हमासका आतङ्ककारीहरूलाई निशाना बनाएर उक्त कारबाही गरेको हो। गाजामा गत अक्टोबर महिनादेखि हमास र इजरायलबीच युद्धविराम लागू भएतापनि सम्झौताको सर्तअनुसार इजरायलले आफ्नो सुरक्षाका लागि खतरा ठानिएका कुनै पनि लक्ष्यमाथि आक्रमण गर्ने अधिकार सुरक्षित राखेको दाबी गर्दै आएको छ र सोही अनुरूप यो आक्रमण गरिएको जनाएको छ।
