अमेरिका । अमेरिकी राष्ट्रपति डोनाल्ड ट्रम्पले इसराइली प्रधानमन्त्री बेन्जमिन नेतन्याहूलाई टेलिफोनमार्फत कडा शब्दमा थर्काएका छन्। इसराइलले हिजबुल्लाहलाई निसाना बनाउने बहानामा लेबननमा आक्रमण तीव्र पारेपछि आक्रोशित बनेका ट्रम्पले नेतन्याहूसँगको संवादमा अपशब्द समेत प्रयोग गरेको अमेरिकी अनलाइन 'एक्सियस' ले खुलासा गरेको छ। सोमबार भएको उक्त तनावपूर्ण टेलिफोन संवादपछि इसराइलले बेरूतमा तय गरेको हमलाको योजना नै तत्कालका लागि रोक्न बाध्य भएको छ।
त्यसबारे जानकार दुई उच्च अमेरिकी अधिकारी र अन्य स्रोतहरूलाई उद्धृत गर्दै एक्सियसले जनाए अनुसार, फोनवार्ता सुरु हुनासाथ ट्रम्प अत्यधिक रिसमा प्रस्तुत भएका थिए। ट्रम्पले कड्किँदै नेतन्याहूलाई भनेका थिए, "तिमी के गरिरहेका छौ? तिमी पागल हौ? के गरेको यो? म नभएको भए तिमी अहिले जेलमा हुन्थ्यौ। तिमीलाई मैले बचाइरहेको छु। सबैले तिमीलाई घृणा गर्छन् र तिम्रो कारणले गर्दा अहिले इसराइललाई पनि धेरैले मन पराउन छाडेका छन्।" ट्रम्पले यदि बेरुतमा आक्रमण योजना अघि बढाए इसराइल विश्वभर थप एक्लिने चेतावनी समेत दिएका थिए।
इसराइलमाथि हिजबुल्लाहले गर्ने आक्रमण रोक्न इसराइलले आफ्नो सुरक्षा गर्नु आवश्यक रहेको कुरा ट्रम्पले बुझे पनि, पछिल्लो समय नेतन्याहूले सैन्य तनावलाई अति नै बढाएको महसुस ट्रम्पले गरेका छन्। विशेष गरी लेबननमा ठूलो संख्यामा सर्वसाधारण मारिएको घटनाले ट्रम्पलाई चिन्तित तुल्याएको छ। हिजबुल्लाहका कमान्डरलाई निसाना बनाउने नाममा पूरै भवन नै ध्वस्त पार्ने इसराइली सैन्य रणनीतिप्रति ट्रम्पले कडा असहमति जनाएका छन्।
यता फोनवार्तापछि जारी वक्तव्यमा प्रधानमन्त्री नेतन्याहूले भने हिजबुल्लाहले आक्रमण नरोके बेरुतका लक्ष्यहरूमा हमला गरिने जानकारी ट्रम्पलाई गराएको दाबी गरेका छन्। उनले दक्षिणी लेबननमा सैन्य अभियान जारी रहने स्पष्ट पार्दै आफ्नो अडान यथावत रहेको बताएका छन्। तर, स्रोतका अनुसार ट्रम्पले कडा रूपमा थर्काउँदा नेतन्याहूले मधुरो स्वरमा "ठिक छ, सबै कुरा व्यवस्थापन भएको सुनिश्चित गर्नुस्" भन्दै जवाफ दिएका थिए। फोनवार्ता लगत्तै ट्रम्पले आफ्नो सामाजिक सञ्जाल 'ट्रुथ सोसल' मा इरानसँगको वार्ता तीव्र गतिमा अघि बढिरहेको जानकारी गराएका थिए।
ट्रम्प र नेतन्याहूबीच इरानसँगको युद्ध रणनीतिलाई लिएर पुरानो मतभेद छ। ट्रम्प तत्काल अर्को भीषण युद्धमा होमिनुभन्दा सम्भावना भएसम्म वार्ताकै माध्यमबाट इरानसँग सम्झौता गर्न चाहन्छन्, जबकि नेतन्याहू इरानमाथि विनाशकारी हमला गर्नुपर्ने पक्षमा छन्। दुई साताअघि पनि ट्रम्पले इरानमाथि हमलाको तयारी गरेर अन्तिम समयमा रोकेका थिए भने फेब्रुअरी २८ को आक्रमणपछि इसराइललाई जानकारी नै नदिई युद्धविराम गरेका थिए, जसका कारण नेतन्याहू ट्रम्पप्रति पहिलेदेखि नै असन्तुष्ट रहँदै आएका थिए। सोमबार इरानले पनि लेबननमा इसराइली कारबाही नरोकिए अमेरिकासँगको वार्ता छाड्ने चेतावनी दिएलगत्तै ट्रम्पले नेतन्याहूलाई इसराइलको कदमप्रति 'कृतघ्न' रहेको आरोप लगाएका हुन्।
