काठमाडौं । प्रदेश सरकारहरूमा देखिएको राजनीतिक अस्थिरता, बजेट निर्माणमा उत्पन्न विवाद र विकासका काममा आएको अवरोध अन्त्य गर्ने उद्देश्यसहित नेपाल कम्युनिष्ट पार्टी (एमाले) र नेपाली कम्युनिष्ट पार्टीबीच प्रदेशस्तरीय सत्ता साझेदारीसम्बन्धी सहमतिपत्र सार्वजनिक भएको छ।
शनिबार सार्वजनिक गरिएको सहमतिअनुसार दुवै दलले प्रदेशसभाहरूमा सहकार्य गर्दै संयुक्त सरकार गठन गर्ने निर्णय गरेका छन्। सहमतिपत्रमा प्रदेश सरकारको नेतृत्व बाँडफाँडसमेत स्पष्ट गरिएको छ।
सहमतिअनुसार कोशी, बागमती र लुम्बिनी प्रदेश सरकारको नेतृत्व नेपाल कम्युनिष्ट पार्टी (एमाले) ले गर्नेछ भने कर्णाली र सुदूरपश्चिम प्रदेश सरकारको नेतृत्व नेपाली कम्युनिष्ट पार्टी ले गर्ने सहमति भएको छ।
यस्तै मधेस र गण्डकी प्रदेश मा भने प्रदेशसभामा प्रतिनिधित्व गर्ने अन्य राजनीतिक दलहरूसँग समेत परामर्श गरी सरकारको नेतृत्व तथा सहभागिताको स्वरूप तय गर्ने उल्लेख गरिएको छ।
सहमतिपत्रमा पछिल्लो समय प्रदेशसभामा बजेट निर्माणमा देखिएका असमझदारी, बजेटविहीनताको अवस्था तथा अस्वस्थ राजनीतिक प्रतिस्पर्धालाई अन्त्य गर्दै जनताको चाहनाअनुसार राजनीतिक स्थिरता, सुशासन, समृद्धि र प्रादेशिक विकासलाई तीव्रता दिने प्रतिबद्धता व्यक्त गरिएको छ।
सहमतिपत्रमा नेपाल कम्युनिष्ट पार्टी (एमाले) का अध्यक्ष केपी शर्मा ओली र नेपाली कम्युनिष्ट पार्टी का संयोजक पुष्पकमल दाहाल ‘प्रचण्ड’ ले हस्ताक्षर गरेका छन्। सहमति २०८३ साल साउन ९ गते सम्पन्न भएको उल्लेख गरिएको छ।
यो सहमतिसँगै प्रदेश सरकारहरूको नयाँ सत्ता समीकरण र नेतृत्व परिवर्तनको प्रक्रिया अघि बढ्ने अपेक्षा गरिएको छ।
