अर्घाखाँची । नेपाली कांग्रेसको १५औँ महाधिवेशनअन्तर्गत अर्घाखाँचीको मालारानी गाउँपालिका-५, बाँगीको वडा अधिवेशन सर्वसम्मत रूपमा सम्पन्न भएको छ।
अधिवेशनले माधवप्रसाद पन्थीको सभापतित्वमा नयाँ वडा कार्यसमिति चयन गरेको छ। अधिवेशनबाट उपसभापतिमा नारायण खड्का, महिला उपसभापतिमा गायत्री विक, सचिवमा गणेश भुसाल र सह=सचिवमा तेजबहादुर केसी चयन हुनुभएको छ।
त्यस्तै वडा कार्यसमिति सदस्यमा विमल भुसाल, गोमा भुसाल, भोलानाथ पराजुली, डम्बरप्रसाद भुसाल, दण्डपानी भुसाल, बुद्धीराम भुसाल, बिनिराम भुसाल, रामबहादुर खड्का, मेगराज भुसाल र देविराम भुसाल लगायत चयन हुनुभएको छ।
अधिवेशनबाट २४ जना क्षेत्रीय प्रतिनिधि समेत निर्वाचित भएका छन्। निर्वाचन अधिकृत निशा थापाका अनुसार क्षेत्रीय प्रतिनिधिमा निर्मला क्षेत्री, विष्णु क्षेत्री, नारायणप्रसाद भुसाल, ठाकुरप्रसाद पन्थी, मणिराम खनाल, हिमलाल भुसाल, डबलप्रसाद भुसाल, गायत्री विक, मिना खनाल, पम्फा क्षेत्री, रामकुमार क्षेत्री, कृष्णप्रसाद भुसाल, केशव पाण्डे, गीता पोखरेल भुसाल, पिताम्बर कुँवर, कविराम पन्थी, जुवानन्द भुसाल, बिनिराम भुसाल, कमला न्यौपाने भुसाल, कमला भुसाल, विमला भुसाल, गोमा भुसाल, हुमकला टण्डन र माधवप्रसाद पन्थी निर्वाचित हुनुभएको जनाइएको छ।
अधिवेशनलाई सम्बोधन गर्दै नेपाली कांग्रेस लुम्बिनी प्रदेशकी पूर्व सचेतक निर्मला क्षेत्रीले लोकतन्त्रको संस्थागत विकास र संरक्षणमा नेपाली कांग्रेसको महत्वपूर्ण भूमिका रहेको बताउनुभयो। उहाँले पार्टीभित्र विचार र नेतृत्वका विषयमा स्वाभाविक बहस भए पनि त्यसलाई आपसी कटुता र विभाजनको कारण बनाउन नहुनेमा जोड दिनुभयो। “नेपाली कांग्रेसको शक्ति नै यसको लोकतान्त्रिक संस्कार, संगठन र कार्यकर्ताबीचको सम्बन्ध हो। त्यसैले सानातिना मतभेदमा अल्झिएर पार्टीको मूल उद्देश्य कमजोर पार्नु हुँदैन,” उहाँले भन्नुभयो।
क्षेत्रीले १५औँ महाधिवेशनलाई पार्टीभित्रको संगठनात्मक पुनर्संरचना, पुस्ताबीचको समन्वय र नेतृत्वप्रति कार्यकर्ताको अपेक्षालाई सम्बोधन गर्ने अवसरका रूपमा लिनुपर्ने धारणा राख्नुभयो। बदलिँदो राजनीतिक परिवेशअनुसार पार्टीले नयाँ पुस्ताको ऊर्जा, अनुभव र संगठनात्मक क्षमतालाई समेट्दै अघि बढ्नुपर्ने उहाँको भनाइ थियो।
उहाँले वडा तहदेखि नै संगठनलाई चलायमान, जनमुखी र प्रभावकारी बनाउन सके त्यसको प्रत्यक्ष प्रभाव आगामी निर्वाचन तथा पार्टीको समग्र राजनीतिक यात्रामा पर्ने बताउनुभयो। “महाधिवेशन केवल नेतृत्व चयन गर्ने प्रक्रिया मात्र होइन, संगठनलाई नयाँ ऊर्जा दिने अवसर पनि हो। वडा तहमा देखिएको यो उत्साह र एकताको भावलाई अझ बलियो बनाउँदै अघि बढ्नुपर्छ,” क्षेत्रीले भन्नुभयो।
महाधिवेशनमा कार्यकर्ताको सक्रिय सहभागिता र संगठनप्रतिको उत्साहले पार्टीको आगामी राजनीतिक यात्रालाई थप व्यवस्थित बनाउन सहयोग पुग्ने उल्लेख गर्दै उहाँले निर्वाचनमा पार्टीको प्रभावकारी उपस्थिति सुनिश्चित गर्न अहिलेबाटै संगठन निर्माण र जनसम्पर्कलाई प्राथमिकता दिनुपर्ने बताउनुभयो।
त्यसैगरी जिल्ला कोषाध्यक्ष बिष्णु क्षेत्रे, प्रदेशसभा ‘क’ क्षेत्रीय सचिव नारायणप्रसाद भुसाल, मालारानी-५ का पूर्व पार्टी सभापति मणिराम खनाल, ठाकुरप्रसाद पन्थी लगायतले वडा तहबाटै पार्टी संगठनलाई थप सुदृढ र व्यवस्थित बनाउन सबै तहका नेता-कार्यकर्ता एकताबद्ध भएर लाग्नुपर्नेमा जोड दिनुभयो।
वक्ताहरूले महाधिवेशनको तयारीसँगै संगठन विस्तार, क्रियाशील सदस्यबीचको समन्वय र स्थानीय तहमा जनतासँगको सम्बन्धलाई थप मजबुत बनाउनुपर्ने आवश्यकता औँल्याउनुभयो।
