भेटका क्रममा उपसचिव हुकरले बाढी तथा पहिरोबाट प्रभावित नेपाली नागरिकप्रति समवेदना व्यक्त गर्दै सम्पर्कविहीन रहेका करिब ७० जना अमेरिकी नागरिकका परिवारप्रति समेत सहानुभूति प्रकट गरिन्।

अमेरिकी सहयोगमध्ये १० मिलियन डलर यातायात पूर्वाधारको पुनःस्थापना तथा क्षेत्रीय सम्पर्क विस्तारमा खर्च गरिनेछ। उक्त रकमबाट अमेरिकी कम्पनीमार्फत स्थायी तथा आवश्यकताअनुसार निर्माण गर्न सकिने पुल खरिद गरी बाढीबाट क्षतिग्रस्त क्षेत्रमा उपलब्ध गराउने योजना रहेको छ।

त्यस्तै, बाढी प्रभावित समुदायको तत्कालीन तथा आगामी आवश्यकतालाई सम्बोधन गर्न खानेपानी, सरसफाइ, आश्रय, संरक्षण, जीविकोपार्जन तथा हिउँदका आवश्यकताका लागि थप ८ मिलियन डलर उपलब्ध गराइने भएको छ।

अमेरिकाले विपद् व्यवस्थापन तथा बाढीपछिको प्रतिकार्य क्षमता थप मजबुत बनाउन अमेरिकामा निर्मित ड्रोन उपलब्ध गराउन १३ मिलियन डलर खर्च गर्ने योजना पनि सार्वजनिक गरेको छ। यसबाट विपद्को समयमा खोज तथा उद्धार, क्षतिको मूल्याङ्कन र प्रतिकार्य व्यवस्थापनमा प्रविधिको प्रयोग बढ्ने अपेक्षा गरिएको छ।

नयाँ सहयोग घोषणासँगै नेपालमा बाढी प्रतिकार्य, राहत तथा पुनःस्थापनाका लागि अमेरिकाले उपलब्ध गराउने कुल सहायता ३६ मिलियन अमेरिकी डलरभन्दा बढी पुगेको अमेरिकी दूतावासले जनाएको छ।

अमेरिकी पक्षले नेपाल सरकारसँग निरन्तर समन्वय गर्दै प्रभावित क्षेत्रको आवश्यकता पहिचानका आधारमा आगामी दिनमा समेत थप सहयोग उपलब्ध गराउने प्रतिबद्धता जनाएको छ। पछिल्लो सहयोगले बाढीबाट क्षतिग्रस्त पूर्वाधार पुनर्निर्माणसँगै प्रभावित समुदायको आधारभूत आवश्यकता र विपद् प्रतिकार्य क्षमता सुदृढ गर्न सहयोग पुग्ने अपेक्षा गरिएको छ।