अर्घाखाँची । नेपाली कांग्रेस अर्घाखाँचीका ६ वटै स्थानीय तहमा पालिका अधिवेशनअन्तर्गत नयाँ नेतृत्व चयन भएको छ। जिल्लाका चार पालिकामा सभापतिसहित नेतृत्व सर्वसम्मत चयन भएको छ भने दुई पालिकामा निर्वाचन प्रक्रियामार्फत सभापति चयन भएका छन्।
पालिका अधिवेशनअन्तर्गत सन्धिखर्क नगरपालिकामा तुल्सी पौडेल, भूमिकास्थान नगरपालिकामा रामप्रसाद घिमिरे ‘तीर्थ’, शितगंगा नगरपालिकामा हिम्मत पोखेल र छत्रदेव गाउँपालिकामा प्रकाशराज पन्थी सभापतिमा सर्वसम्मत निर्वाचित हुनुभएको छ।
त्यस्तै, पाणिनि गाउँपालिकामा नुरमहम्मद मिया र मालारानी गाउँपालिकामा राजेन्द्र विक ‘रमेश’ सभापतिमा निर्वाचित हुनुभएको छ।
पालिका अधिवेशनको निर्वाचन प्रक्रिया शान्तिपूर्ण, निष्पक्ष, पारदर्शी र सौहार्दपूर्ण वातावरणमा सम्पन्न गर्न मुख्य निर्वाचन अधिकृत अधिवक्ता अञ्जु रेग्मीको नेतृत्वमा निर्वाचन प्रक्रिया अघि बढाइएको थियो।
मुख्य निर्वाचन अधिकृत रेग्मीका अनुसार निर्वाचन प्रक्रियालाई व्यवस्थित, मर्यादित र निष्पक्ष बनाउन आवश्यक निर्वाचन मापदण्ड तथा प्रक्रियालाई पालना गर्दै पालिका अधिवेशन सम्पन्न गरिएको हो। उहाँका अनुसार सभापतिसहित उपसभापति, सचिव, सहसचिव लगायतका सबै पदमा समेत सर्वसम्मत नेतृत्व चयन भएको छ।
पालिका अधिवेशनमा देखिएको सहमति र सर्वसम्मतिले पार्टीभित्रको लोकतान्त्रिक अभ्याससँगै संगठनात्मक एकता र सहकार्यको सन्देश दिएको छ।
निर्वाचन प्रक्रिया सम्पन्न भएसँगै नवनिर्वाचित सभापति, पदाधिकारी तथा प्रतिनिधिहरूलाई बधाई तथा शुभकामना व्यक्त गरिएको छ। नयाँ नेतृत्वले आगामी दिनमा नेपाली कांग्रेस अर्घाखाँचीको संगठनलाई थप सुदृढ, एकताबद्ध र जनमुखी बनाउन महत्वपूर्ण भूमिका खेल्ने अपेक्षा गरिएको छ।
मुख्य निर्वाचन अधिकृत अधिवक्ता अञ्जु रेग्मीको संयोजनमा जिल्लाका वडा र पालिका अधिवेशनहरू शान्तिपूर्ण र निष्पक्ष रूपमा सम्पन्न हुनु निर्वाचन प्रक्रियाको महत्वपूर्ण उपलब्धिका रूपमा लिइएको छ।
