गुल्मी । धुर्कोट गाउँपालिका–५ मा लत्रिएको बिजुलीको तारमा करेन्ट लाग्दा एक जनाको मृत्यु भएको छ । मृत्यु हुनेमा स्थानीय ऋषिराम भण्डारी रहेका छन् ।
जिल्ला प्रहरी कार्यालय गुल्मीका अनुसार भण्डारी मंगलबार दिउँसो सिमलचौर र चापटारीस्थित आफ्नै खेतमा पानी लगाउन भन्दै घरबाट निस्किएका थिए । साँझसम्म पनि उनी घर नफर्किएपछि आफन्त तथा छरछिमेकीले खोजी सुरु गरेका थिए ।
खोजीका क्रममा बुधबार बिहान खेत नजिकै लत्रिएको बिजुलीको तारमा परी मृत्यु भएको अवस्थामा भण्डारीलाई फेला पारिएको प्रहरीले जनाएको छ । जिल्ला प्रहरी कार्यालय गुल्मीका प्रहरी नायब उपरीक्षक वीरेन्द्रवीर विश्वकर्माले घटनाको पुष्टि गर्दै घटनाबारे थप अनुसन्धान भइरहेको जानकारी दिए ।
खेतबारी तथा ग्रामीण क्षेत्रमा लत्रिएका र अव्यवस्थित विद्युत् तारका कारण जोखिम बढ्दै गएपछि स्थानीयवासीले विद्युत् संरचनाको नियमित निरीक्षण तथा सम्भावित दुर्घटना रोक्न सम्बन्धित निकायको ध्यानाकर्षण गराएका छन् ।
