काठमाण्डौ । साताको अन्तिम कारोबार दिन शुक्रबार नेपाल स्टक एक्सचेञ्ज (नेप्से) परिसूचक १.७७ अंकले बढेर २७३१.९४ विन्दुमा पुगेको छ। नेप्सेसँगै यस दिन सेन्सेटिभ इण्डेक्स ०.३४ अंक, फ्लोट इण्डेक्स ०.०४ अंक र सेन्सेटिभ फ्लोट इण्डेक्स ०.०९ अंकले बढेका छन्। परिसूचकमा सामान्य सुधार देखिए पनि कारोबार रकममा भने अघिल्लो दिनको तुलनामा गिरावट आएको छ। बिहीबार ३ अर्ब २९ करोड रुपैयाँको शेयर खरिदबिक्री भएको बजारमा शुक्रबार ३३८ कम्पनीको ४३ हजार ६७४ पटकको कारोबारमा ३ अर्ब ९ करोड ७९ लाख ५३ हजार रुपैयाँ बराबरको ७९ लाख ३४ हजार कित्ता शेयर मात्र किनबेच भएको छ।
यस दिन ७ प्रतिशत नबिल डिबेञ्चर २०८९ को मूल्य सर्वाधिक ७.७१ प्रतिशतले बढेको छ भने मोदी इनर्जीको शेयरमूल्य ५ प्रतिशतभन्दा बढीले उकालो लागेको छ। अन्य बढेका स्टकहरूको वृद्धिदर साढे ३ प्रतिशतभन्दा कमै सीमित रह्यो। उता युनियन हाइड्रोपावरको शेयरमूल्यमा भने सर्वाधिक १४.७९ प्रतिशतको गिरावट आएको छ भने क्रेष्ट माइक्रो लाइफ इन्स्योरेन्सको शेयरमूल्य पनि करिब ६ प्रतिशतले घटेको छ।
बजारमा सर्वाधिक गुमाए पनि कारोबार रकमका आधारमा युनियन हाइड्रोपावर नै शीर्ष स्थानमा रह्यो, जसको ३० करोड ६६ लाख ४९ हजार रुपैयाँ बराबरको शेयर किनबेच भयो। यस्तै, अपि पावर कम्पनीको साढे ११ करोड र रिलायन्स स्पिनिङ्ग मिल्सको साढे ८ करोड रुपैयाँभन्दा बढीको कारोबार भएको छ। सामूहिक सूचकतरफ हेर्दा १३ उपसमूहमध्ये यस दिन बैंकिङ्ग, वित्त, होटल तथा पर्यटन, जलविद्युत, निर्जीवन बीमा, अन्य र व्यापारसहित ७ उपसमूहको परिसूचक बढेको छ भने बाँकी ६ उपसमूहको परिसूचकमा गिरावट देखिएको छ।
