काठमाडौं । आर्थिक गतिविधि विस्तारसँगै वाणिज्य बैंकहरूले निर्माण क्षेत्रमा कर्जा प्रवाह उल्लेखनीय रूपमा बढाएका छन्। गत आर्थिक वर्ष २०८२/८३ को जेठ मसान्तसम्म २० वाणिज्य बैंकहरूले निर्माण क्षेत्रमा २ खर्ब ३१ अर्ब १ करोड ५६ लाख रुपैयाँ कर्जा प्रवाह गरेका छन्, जुन अघिल्लो आर्थिक वर्षको सोही अवधिको तुलनामा ११.१७ प्रतिशतले बढी हो।
निर्माण तथा पूर्वाधार क्षेत्रमा लगानी विस्तार गर्ने क्रममा अधिकांश वाणिज्य बैंकहरूले आफ्नो कर्जा पोर्टफोलियो बढाएका छन्। यसले बैंकिङ क्षेत्र निर्माण उद्योगप्रति सकारात्मक बन्दै गएको संकेत गरेको विश्लेषण गरिएको छ।
यस अवधिमा निर्माण क्षेत्रमा सबैभन्दा बढी कर्जा प्रवाह गर्ने बैंक नबिल बैंक बनेको छ। नबिल बैंकले निर्माण क्षेत्रमा २७ अर्ब २९ करोड २६ लाख रुपैयाँ कर्जा लगानी गरेको छ, जुन अघिल्लो आर्थिक वर्षको सोही अवधिको तुलनामा ५.८७ प्रतिशतले बढी हो।
निर्माण क्षेत्रमा बैंकहरूको लगानी बढेसँगै पूर्वाधार विकास, आवास, व्यावसायिक भवन तथा अन्य निर्माण परियोजनामा वित्तीय पहुँच विस्तार हुने अपेक्षा गरिएको छ। यद्यपि, निर्माण सामग्रीको मूल्य, परियोजना कार्यान्वयनको गति र समग्र आर्थिक गतिविधिले आगामी दिनमा यस क्षेत्रको कर्जा प्रवाहलाई थप प्रभावित गर्ने देखिन्छ।
