काठमाडौं । नेपाल प्रिमियर लिग (एनपीएल) अन्तर्गत आज अंकतालिकाको शीर्ष स्थानमा रहेको लुम्बिनी लायन्स र काठमान्डु गोर्खाजबीच प्रतिस्पर्धा हुँदैछ। त्रिवि अन्तर्राष्ट्रिय क्रिकेट मैदानमा साँझ ५ बजे सुरु हुने खेलमा काठमान्डु अपराजित लुम्बिनीको विजयी यात्रामा पूर्णविराम लगाउने लक्ष्यसहित मैदान उत्रिनेछ।
लिगमा उत्कृष्ट लय कायम राखेको लुम्बिनी ७ अंकसहित अंकतालिकाको शीर्ष स्थानमा छ। चार खेल खेलेको लुम्बिनीले तीन खेलमा जित निकालेको छ भने एक खेल वर्षाका कारण रद्द भएपछि अंक बाँडेको छ। त्यसैले टोली अहिलेसम्म अपराजित रहँदै आएको छ।
यता काठमान्डु गोर्खाज ४ अंकसहित अंकतालिकाको चौथो स्थानमा छ। तीन खेल खेलेको काठमान्डुले दुई खेलमा जित हात पारेको छ भने एक खेलमा पराजय बेहोरेको छ।
शीर्ष स्थानमा रहेको लुम्बिनी आफ्नो अपराजित यात्रा कायम राख्ने योजनामा हुनेछ भने काठमान्डु जित निकाल्दै अंकतालिकामा थप सुधार गर्ने दाउमा छ। दुवै टोलीका लागि महत्वपूर्ण मानिएको आजको खेलले अंकतालिकाको समीकरणमा समेत प्रभाव पार्ने अपेक्षा गरिएको छ।
