कैलाली। कैलालीको भजनी नगरपालिका–१ का रामकुमार महतो कृषिमा आबद्ध छन् । कृषिबाटै जनजीविका चलाउँदै आएका उनको वर्षौं देखिको दुःख यतिबेला हराएको छ । स्थानीयले छाडा चौपाया छोडेका कारण लगाएको अन्न बाली बर्सेनि नष्ट हुन थालेपछि कुनै बेला उनी खेती गर्न छोड्ने मनस्थितिमा पुगेका थिए । नगरपालिकाले छाडा चौपाया व्यवस्थापन गर्न सफल भएपछि महतो जस्ता कैयौँ किसानलाई राहत भएको छ ।
केही समय पहिले छाडा चौपायाका कारण रात दिन खेतमै बास बस्नुपर्ने बाध्यता भएको सुनाउदै महतोले नगरपालिकाले छाडा चौपाया व्यवस्थापन गरिदिए पछि यसवर्ष गहुँ भित्र्याउन पाएको अनुभव सुनाए । चौपायाले आधा भन्दा बढी बाली नष्ट गरिसकेको अनुभव सुनाउदै उनले भने अब रातदिन खेतमै बस्नुपर्ने बाध्यता अन्त्य भएको छ ।
त्यसै गरी जानकी गाउँपालिकाका सुरेन्द्र चौधरी पनि चौपायाको समस्या कम हुँदै गएकोमा खुसी व्यक्त गरेका छन् । उनले खेतमा त्रिपाल हालेर चौपायाको हेरालु राख्नुपर्ने स्थिति यस वर्ष नआएको बताए । उनले स्थानीय सरकारले छाडा चौपायाको व्यवस्थापन गरे जस्तै कृषकका लागी चाहिने मल,बिउ लगायतका सामाग्रीहरु समयमा नै उपलब्ध गराए किसानलाई राहत हुने बताए ।
