बुटवल । लुम्बिनी प्रदेश सरकारले आगामी आर्थिक वर्ष २०८०/०८१ का लागि आज बजेट ल्याउँदैछ । प्रदेश सभाको बैठकमा आज आर्थिक मामिला मन्त्री धनबहादुर मास्कीले आगामी वर्षको बजेट प्रस्तुत गर्ने तयारी छ। करिब ४० अर्ब हाराहारीको बजेट ल्याउन लागेको स्रोतले बताएको छ । यसअघि आन्तरिक स्रोत तथा संघीय सरकारले दिने अनुदान घटेको भन्दै करिब ३३ अर्बको बजेट ल्याउने गरी तयारी गरिएको आर्थिक मामिला मन्त्रालयका कर्मचारीले जनाएका थिए ।
यसपटकको बजेटबाट प्रत्यक्ष निर्वाचित प्रदेश सभा सदस्यहरुलाई २ करोड ७५ लाख बजेटका योजना उपलब्ध गराइने भएको छ । प्रत्यक्ष निर्वाचित सांसदहरुको क्षेत्र अनुसार उक्त रकम वितरण गर्ने र समानुपातिक सांसदलाई नदिने सरकारको तयारी सरकारले गरेकाले विरोधपछि समानुपातिक सांसदहरुलाई पनि ७५ लाख बराबरका योजना समावेश गर्न दिइने बताइएको छ ।
प्रदेशमा ५२ प्रदेश सभा निर्वाचन क्षेत्र रहेका छन् । त्यसैगरी समानुपातिक सांसदहरुलाई चित्त बुझाउनेगरी प्रतिसांसद ७५ लाख बराबरका योजना बजेटमा समावेश गर्न लागिएको छ । ३५ जना समानुपातिक सांसद छन् । पहिले वर्षको बजेटभन्दा आगामी आर्थिक वर्ष २०८०/८१ का लागि २० प्रतिशत कटौती गरेर बजेट ल्याउने तयारी गरिएको थियो । यसअनुसार गत वर्षको भन्दा करिब १० अर्ब बजेटको आकार घट्ने अनुमान गरिएपनि चौतर्फि दवावले अर्थमन्त्री मास्कीले बजेटको आकार बढाएका हुन् । प्रदेश सरकारले गतवर्ष ४२ अर्ब ६३ करोड ५७ लाख बजेट ल्याएको थियो ।
