काठमाडौँ - फिफा विश्वकप फुटबल सन् २०२६ को उपाधिका लागि आज राति युरोपियन च्याम्पियन स्पेन र साबिक उपाधि विजेता अर्जेन्टिनाबीच खेल हुँदैछ ।
अमेरिकाको मेटलाइफ स्टेडियममा खेल नेपाली समयअनुसार राति पौने १ बजे शुरु हुनेछ । प्रतियोगिताभर अर्जेन्टिनाले सर्वाधिक १९ गोल गरेको छ भने स्पेनले जम्मा एक गोल मात्र बेहोरेको छ । ३९ दिनसम्म चलेको विश्वकपको अन्तिम खेलमा अर्जेन्टिनाको आक्रामक शैली र स्पेनको उत्कृष्ट रक्षापङ्क्तिबीच कडा प्रतिस्पर्धा हुने अपेक्षा गरिएको छ ।
यो विश्वकपको फाइनलमा १९ वर्षीय युवा स्टार लामिन यामाल र ३९ वर्षीय स्टार लियोनेल मेस्सीबीचको प्रतिस्पर्धाले पनि खेललाई थप विशेष बनाएको छ । अर्जेन्टिनाका कप्तान मेसी आठ गोल र चार असिस्टसहित गोल्डेन बुट तथा गोल्डेन बलका प्रमुख दाबेदार बनेका छन् । तर फ्रान्सका किलियन एम्बाप्पे १० गोलसहित शीर्ष स्थानमा छन् ।
यता स्पेनले सन् २०१० पछि दोस्रो पटक विश्वकप जित्ने लक्ष्य राखेको छ । स्पेन र अर्जेन्टिनाबीच हालसम्म १४ खेल भएका छन् । दुवै टोलीले समान ६–६ खेल जितेका छन् भने दुई खेल बराबरीमा सकिएका छन् ।
विश्वकपमा स्पेन र अर्जेन्टिना ६० वर्षपछि पहिलो पटक खेल्न लागेका हुन् । यसअघि सन् १९६६ को समूह चरणमा यी दुई टोलीले खेलेका थिए । त्यस बेला अर्जेन्टिना २–१ ले विजयी भएको थियो ।
