काठमाण्डौँ । मलेसियासँगको ५ खेलको टी-२० सिरिजको दोस्रो खेलमा नेपालले घरेलु टोलीलाई ७ विकेटले पराजित गर्दै सिरिजलाई १/१ को अवस्थामा ल्याएको छ। पहिलो खेलमा पराजित नेपालले दोस्रो खेलमा भने सहज जित हासिल गर्यो। टस जितेर पहिले ब्याटिङ गरेको मलेसियाले दिएको ९७ रनको लक्ष्य नेपालले १७.३ ओभरमा ३ विकेट गुमाएर पूरा गरेको थियो।
नेपालको जितमा कप्तान रुविना क्षेत्रीले २१ बलमा ३ चौका र १ छक्कासहित अविजित २९ रनको इनिङ खेलिन्। त्यस्तै, कविता कुवरले २६ रन बनाउँदा सिता राना मगरले २३ रन बनाएकी थिइन्।
नेपाललाई ओपनर कविता कुँवर र सीता रानामगरले राम्रो सुरुवात दिलाए। उनीहरूले पहिलो विकेटका लागि ४२ बलमा ३३ रनको साझेदारी गरेका थिए। त्यस्तै, नेपालका लागि विन्दु रावल १८ बलमा २ चौकासहित १७ रन बनाएकी थिइन्। मलेसियाकी ऐश्या एलिसा, निक नुर र विनीफ्रन्ड आनीले समान १/१ विकेट लिए।
त्यसअघि टस जितेर पहिले ब्याटिङ गरेको मलेसियाले निर्धारित २० ओभरमा ५ विकेट गुमाएर ९६ रन बनाएको थियो। मलेसियाको लागि मास एलिसा यासमिन जुक्किफीले ३४ बलमा २ चौकासहित सर्वाधिक २८ रन बनाउँदा दुरासिंघम २६ बलमा ३ चौकासहित २० रन बनाइन्। वान जुलिया ३५ बलमा २० रनमा आउट हुँदा हामिजाह हाशिम १४ रनमा अविजित रहेकी थिइन्। नेपालको लागि कप्तान रुविना क्षेत्रीले २ तथा इन्दु बर्मा र कविता कुँवरले समान १/१ विकेट लिए। नेपाल पहिलो खेलमा मलेसियासँग ५ विकेटले पराजित भएको थियो। जेठ १८ मा नेपालले तेस्रो खेल खेल्नेछ। जेठ २० र २१ मा नेपालले चौथो र पाँचौँ खेल खेल्ने कार्यतालिका रहेको छ।
