बुटवल । प्याब्सन बुटवलको आयोजनामा बुटवलमा रहेका सामुदायिक तथा संस्थागत विद्यालयका गणित विषयका शिक्षकहरुलाई एक दिवसीय तालिम सम्पन्न भएको छ ।
बुटवल नगरपालिकाको नगर सभाहलमा सम्पन्न उक्त कार्यक्रममा प्याब्सन बुटवलका अध्यक्ष मित्रहरि आचार्यको अध्यक्षता तथा बुटवल उपमहानगरपालिकाका नगर प्रमुख खेलराज पाण्डेको प्रमुख आतिथ्यता रहेको थियो ।
माध्यमिक शिक्षा शाखा प्रमुख तथा उप – निर्देशक टिकाराम पन्थी, बाल तथा आधारभूत शाखा प्रमुख कमला चुदाली, शिक्षा शाखा अधिकृत यादवचन्द्र विष्टका साथै शिक्षक संघ रुपन्देहीका उपाध्यक्ष तथा ज्ञानोदय माध्यमिक बिद्यालयका प्राचार्य टीकाराम शर्मा पौडेललगायतको सहभागिता रहेको थियोे । उक्त कार्यक्रम वेदान्त पब्लिकेशनको गणित विषयका लेखक तथा प्रशिक्षक हुकुम दाहालको प्रशिक्षणमा सम्पन्न भएको छ ।
सो कार्यक्रममा बोल्दै बुटवल नगरपालिकाका नगर प्रमुख खेलराज पाण्डेयले बुटवल नगरले राख्ने कार्यक्रम प्याब्सन बुटवलले गरेकोमा खुलेर प्रशंसा गरेका थिए ।
सोही कार्यक्रममा बोल्दै शिक्षक संघ रूपन्देहीका उपाध्यक्ष तथा ज्ञानोदय माध्यमिक बिद्यालयका प्राचार्य टिकाराम शर्मा पौडेलले नगरपालिकाले समेत सामुदायिक तथा संस्थागत विद्यालय सबैलाई एउटै नजरले हेरेको अवस्थामा प्याब्सन बुटवलले पनि सोही अनुसार गरेकोमा सराहना व्यक्त गरेका थिए ।
यसैगरी उक्त कार्यक्रममा बुटवल उपमहानगरपालिका शिक्षा शाखा प्रमुख तथा उप निर्देशक टिकाराम पन्थी साथै बाल तथा आधारभूत शिक्षा शाखा प्रमुख कमला चुँदालीले आफ्नो मन्तव्य राखेकी थिइन् ।
प्याब्सन बुटवलका सचिव भुवन अधिकारीको सञ्चालनमा संचालित कार्यक्रममा ६४ जनाको उपस्थिति रहेको थियो । उक्त कार्यक्रममा सहभागी सामुदायिक विद्यालयको तर्फबाट विष्णु भुसाल तथा संस्थागत विद्यालयको तर्फबाट बिनोद बोहोराले आ -आफ्नो धारणा राखेका थिए ।
