काठमाण्डौ – लगातार चुनावमा पराजित भएपछि जापानका प्रधानमन्त्री सिगेरु इशिबाले राजिनामा दिने घोषणा गर्नुभएको छ । पद सम्हालेको एक वर्ष पनि नपुग्दै उहाँले राजीनामा दिने निर्णय गर्नुभएको बीबीसीले जनाएको छ ।
सत्तारूढ लिबरल डेमोक्रेटिक पार्टी (एलडीपी)ले १५ वर्षपछि पहिलोपटक जापानको प्रतिनिधिसभामा बहुमत गुमाएको छ । पार्टीले यसैवर्ष जुलाईमा उच्च सदनमा पनि बहुमत गुमाएको छ । यसले प्रधानमन्त्री इशिबामाथि ठूलो दबाब सिर्जना गरेको खबरमा उल्लेख छ ।
एलडीपीले गएको सात दशकदेखि धेरैजसा समय जापानमा शासन गर्दै आएको भए पनि इशिबाको नेतृत्वमा पार्टीले ऐतिहासिक हार बेहोरेको छ । अब एलडीपीले नयाँ नेता छान्ने र संसदले प्रधानमन्त्रीका रूपमा अनुमोदन गर्ने भनिएको छ । इशिबा गएको एकवर्ष अघि अक्टोबरमा जापानको प्रधानमन्त्री बन्नु भएको थियो ।
