काठमाडौं– आईसीसी टी-२० विश्वकप २०२६ अन्तर्गत समूह ‘सी’मा रहेको नेपालले अन्तिम खेलमा आज स्कटल्यान्डसँग प्रतिस्पर्धा गर्दैछ ।
नेपाल र स्कटल्यान्डको खेल नेपाली समय अनुसार मंगलबार साँझ ७ बजेर १५ मिनेटमा भारतको मुम्बईस्थित वनखेडे मैदानमा हुँदैछ ।
समूह ‘सी’मा रहेको नेपाल तीन खेल खेल्दा अंकबिहीन छ । स्कटल्यान्डले भने दुई अंक जोडेको छ । यो समूहबाट स्कटल्यान्ड र इंग्ल्यान्ड सुपर आठमा प्रवेश गरिसकेका छन् । इटाली र स्कटल्यान्डले दुईदुई अंक जोड्दा नेपाल भने अंकबिहीन छ । विश्वकपबाट बाहिरिसकेको नेपालमाथि आज सान्त्वना जित निकाल्ने अवसर बाँकी छ ।
नेपालका तीन खेल : कुन कस्तो ?
पहिलो खेलमा इंग्ल्यान्डले दिएको १८५ रनको लक्ष्य पछ्याएको नेपाल चार रनले चुकेको हो। नेपालले २० ओभरको समाप्तिमा ६ विकेटको क्षतिमा १८० रन बनाएको थियो।
दोस्रो खेलमा कमजोर प्रदर्शन गर्दै नेपाल इटालीसँग १० विकेटले पराजित भयो। टस हारेर सुरुमा ब्याटिङ गरेको नेपालले बनाएको १२३ रन इटालीले बिना विकेटको क्षतिमा भेट्टाएको थियो ।
तेस्रो खेलमा नेपाल वेस्ट इन्डिजसँग ९ विकेटले पराजित भयो । टस जितेर वेस्ट इन्डिजले फिल्डिङ रोजेपछि पहिले ब्याटिङ गरेको नेपालले १३३ रन मात्र बनाउन सक्यो । नेपालले दिएको १३४ रनको लक्ष्य वेस्ट इन्डिजले १५ ओभरमा २ बलमा १ विकेटको क्षतिमा भेट्टाएको हो ।
नेपालको विश्वकप यात्रा
नेपालले सन् २०१४ मा बंगलादेशले आयोजना गरेको विश्वकपमा पहिलोपटक स्थान पक्का गरेको थियो। नेपालले दोस्रोपटक विश्वकप खेल्न १० वर्ष लगायो। सन् २०२४ को विश्वकपमा नेपालले दक्षिण अफ्रिका र बंगलादेशविरुद्ध उत्कृष्ट प्रदर्शन गरी विश्व क्रिकेटमा आफूलाई केन्द्रित बनाएको छ। अघिल्लो विश्वकपमा दक्षिण अफ्रिकासँग नेपाल एक रनले पराजित भएको थियो।
यसअघि दुईपटक विश्वकप खेलेको नेपाल समूह चरणभन्दा माथि जान सकेको छैन। नेपालले लगातार दोस्रो पटक रोहितकुमार पौडेलको कप्तानीमा विश्वकप खेलेको हो । तीव्र गतिका बलर सोमपाल कामी नेपालबाट तीन वटा विश्वकप खेल्ने एक्लो खेलाडी बनेका छन् ।
विश्वकपको समूह ‘सी’मा रहेको नेपालले इंग्ल्यान्डसँग खेल्दै विश्वकपको सुरुवात गरेको हो। समूह सीमा नेपालसहित दुई पटकको विश्व विजेता वेस्ट इन्डिज, एक पटकको विजेता इंग्ल्यान्डसँगै स्कटल्यान्ड र इटाली छन्। बंगलादेशले भारतमा विश्वकप खेल्न अस्वीकार गरेपछि आईसीसी रेङ्किङका आधारमा स्कटल्यान्डले अवसर पाएको हो।
विश्वकपमा नेपाली टिम
रोहित पौडेल (कप्तान), दीपेन्द्रसिंह ऐरी (उपकप्तान), सोमपाल कामी, करण केसी, नन्दन यादव, सन्दीप लामिछाने, कुशल भुर्तेल, आसिफ शेख, सन्दीप जोरा, आरिफ शेख, बसिर अहमद, गुल्सन झा, ललित राजवंशी, शेर मल्ल र लोकेश बम।
समूह सीमा वेस्ट इन्डिज ६ अंकसहित शीर्ष स्थानमा छ भने इंग्ल्यान्डसमेत ६ अंक जोडेर दोस्रो स्थानमा छ । नेपाल रहेको समूहबाट यी दुई टिम सुपर आठमा प्रवेश गर्दा इटाली, स्कटल्यान्ड र नेपाल बाहिरीसकेका छन् ।
