मस्को । युक्रेनी ड्रोन आक्रमण र साइबर हमलाको छायाबीच सम्पन्न रुसी संसदीय निर्वाचनमा राष्ट्रपति भ्लादिमिर पुटिनको सत्तारूढ युनाइटेड रसिया पार्टीले स्पष्ट बहुमत हासिल गरेको छ । प्रारम्भिक मतगणनामा उक्त दलले ४५० सदस्यीय राज्य डुमामा ३५५ सिट जित्ने स्थिति बनेको रुसी केन्द्रीय निर्वाचन आयोगले जनाएको छ ।
सन् २०२२ मा युक्रेनमाथि रुसले पूर्णस्तरको सैन्य कारबाही सुरु गरेपछि भएको यो पहिलो संसदीय निर्वाचन हो । ९५ प्रतिशतभन्दा बढी मतगणना हुँदा युनाइटेड रसियाले ५७.८३ प्रतिशत मत प्राप्त गरेको निर्वाचन आयोगले जनाएको छ । सन् २०२१ को निर्वाचनमा यो दलले ४९.८ प्रतिशत मत पाएको थियो ।
यसअघि करिब ७१ प्रतिशत मतगणना हुँदा युनाइटेड रसियाले ५७.५ प्रतिशत मत पाएको थियो । कम्युनिस्ट पार्टी १४ प्रतिशत र राष्ट्रवादी एलडिपिआर ८.७ प्रतिशत मतसहित क्रमशः दोस्रो र तेस्रो स्थानमा थिए ।
निर्वाचनका क्रममा भने रुस–युक्रेन युद्धको प्रभाव प्रत्यक्ष देखियो । मतदानको अन्तिम दिन युक्रेनले मस्को र आसपासका क्षेत्रमा ठूलो ड्रोन आक्रमण गरेको रुसी अधिकारीहरूले बताएका छन् । मस्कोका मेयर सर्गेइ सोब्यानिनका अनुसार करिब १ हजार ६ सय ड्रोन प्रहार गरिएकामा करिब ४५० राजधानी मस्कोतर्फ लक्षित थिए । आक्रमणमा कम्तीमा दुई जनाको मृत्यु भएको र पूर्वाधारमा क्षति पुगेको रुसी पक्षको भनाइ छ ।
त्यस्तै, रुसी निर्वाचन पूर्वाधारमाथि एक हजारभन्दा बढी चरणमा डिडिओएस साइबर आक्रमण भएको केन्द्रीय निर्वाचन आयोगकी अध्यक्ष एला पामफिलोभाले बताएकी छन् । उनका अनुसार आक्रमणहरू समन्वित प्रकृतिका थिए र अत्याधुनिक प्रविधि तथा कृत्रिम बौद्धिकता प्रयोग भएको देखिएको थियो ।
निर्वाचनमा पुटिन सरकार तथा युक्रेन युद्धको आलोचना गर्ने शक्तिहरूको सहभागितालाई लिएर पनि विवाद देखिएको थियो । युद्धविरोधी याब्लोको पार्टीलाई निर्वाचनअघि सङ्घीय सूचीमा उम्मेदवारी दिन सर्वोच्च अदालतले रोक लगाएको थियो । यद्यपि उसका केही उम्मेदवार एकल निर्वाचन क्षेत्रबाट प्रतिस्पर्धामा रहेका थिए । रुसले नियन्त्रणमा लिएको युक्रेनका केही भूभागमा समेत मतदान गराइएको थियो ।
प्रारम्भिक परिणामअनुसार युनाइटेड रसियाले राज्य डुमामा संवैधानिक बहुमत कायम राख्ने देखिएको छ । निर्वाचनको परिणामलाई पुटिनले युक्रेन युद्धप्रति जनसमर्थनको संकेतका रूपमा प्रस्तुत गर्न सक्ने बताइएको छ । यता युक्रेनले रुसमा भएको मतदानलाई अस्वीकार गर्दै आएको छ । एजेन्सी
