काठमाडौँ । नेपाल विज्ञापन बोर्डको कार्यकारी अध्यक्षमा सन्तोष श्रेष्ठ नियुक्त भएका छन्। मन्त्रिपरिषद्को असोज २ गतेको निर्णयअनुसार काठमाडौँ महानगरपालिका–१४ निवासी श्रेष्ठलाई बढीमा चार वर्षका लागि बोर्डको अध्यक्ष नियुक्त गरिएको हो।
नवनियुक्त अध्यक्ष श्रेष्ठले बुधबार सूचना तथा सञ्चारमन्त्री डा. विक्रम तिमिल्सिनासमक्ष पद तथा गोपनीयताको शपथ लिएका छन्।
शपथ ग्रहणपछि मन्त्री तिमिल्सिनाले अध्यक्ष श्रेष्ठलाई नेपालको विज्ञापन क्षेत्रलाई थप व्यवस्थित, पारदर्शी र प्रभावकारी बनाउन परिणाममुखी ढङ्गले काम गर्न निर्देशन दिएका छन्।
मन्त्री तिमिल्सिनाले विज्ञापन क्षेत्रको नियमन, व्यवस्थापन तथा सुधारमा बोर्डले आफ्नो अधिकार र जिम्मेवारीअनुसार प्रभावकारी भूमिका निर्वाह गर्नुपर्नेमा जोड दिए।
विज्ञापन बजारको विस्तारसँगै यस क्षेत्रमा देखिएका नियमन, व्यवस्थापन तथा पारदर्शितासम्बन्धी विषयलाई व्यवस्थित गर्न बोर्डको भूमिका महत्वपूर्ण हुने भएकाले नवनियुक्त अध्यक्ष श्रेष्ठसमक्ष प्रभावकारी नेतृत्वको अपेक्षा गरिएको छ।
चार वर्षसम्मको कार्यकालका लागि जिम्मेवारी पाएका श्रेष्ठले विज्ञापन क्षेत्रको नियमन तथा व्यवस्थापनलाई प्रभावकारी बनाउँदै बोर्डको संस्थागत भूमिकालाई थप सुदृढ गर्ने जिम्मेवारी पाएका छन्।
