कपिलवस्तु । जिल्ला प्रहरी कार्यालय कपिलवस्तुले चक्कु प्रहार गरी हत्या गरेको अभियोगमा एक जनालाई पक्राउ गरेको छ । पक्राउ पर्नेमा रुपन्देहीको कञ्चन गाउँपालिका–२ निवासी २२ वर्षीय मोहन थारु रहेको जिल्ला प्रहरी कार्यालय कपिलवस्तुले जनाएको छ ।
प्रहरीका अनुसार अन्जनी थारु र मोहन थारु बीच प्रेम सम्बन्धमा रहेको र अन्जनी थारुले विवाह प्रस्ताव अस्वीकार गरेको रिसमा घरमै आई चक्कु प्रहार गरेको खुल्न आएको छ । चक्कु प्रहारबाट गम्भिर घाइते भएका कपिलवस्तु बाणगंगा नगरपालिका–६,मटेरिया निवासी ७० वर्षीय बम बहादुर थारुको कपिलवस्तु सामुदायिक अस्पताल र निजको भतिजी नाता पर्ने १८ वर्षकी अन्जनी थारुको मेडिकल कलेज भैरहवामा उपचारका क्रममा मृत्यु भएको कपिलवस्तुका प्रहरी उपरीक्षक मिन बहादुर घलेले बताए ।
मोहन थारुलाई पक्राउ गरी थप अनुसन्धान कार्य भईरहेको प्रहरीले जनाएको छ ।
